د سیلاب ځپلو کورنیو سره د مرستو په لړ کې نن د مرکز په ګډون د قرغیو او الینګار ولسوالیو په ۲۹۷ کورنیو د اضطرار کمیټې له لوري مرستې وویشل شوې.
د غذايي او غیر غذايي توکو ۱۶ قلمه مرستې چې د اسلامیک ریلیف مؤسسې له خوا چمتو شوې وې، د ولایت د مرستیال، په افغانستان کې د یادې مؤسسې د عمومي رئیس ډاکتر محمد سید علوم او د اضطرار کمیټې تر نظر لاندې په مرکز مهترلام کې په ۹۴ او په قرغیو ولسوالۍ کې په ۸۳ هغو کورنیو وویشل شوې د کومو چې سروې له وړاندې تر سره شوې وه.
بل لور ته د الینګار ولسوالۍ په ۱۲۰ زیانمنو شویو کورنیو د یونیسف ادارې له خوا لس قلمه غیر غذايي توکو برابره شوې مرسته د لغمان د کلیو بیارغونې او پراختیا ریاست له لوري وویشل شوه.
د یادونې ده چې د تیرې اونۍ د زیاتو اورښتونو، سیلابونو او د دولت شاه ولسوالۍ د فرشغان په سیمه کې د واورې له امله د کرنیزو ځمکو او نورو مالي او ځاني اوښتو زیانونو تر څنګ په زیات شمیر کورنۍ هم زیانمنې شوې وې چې لا یې هم سروې روانه ده.