تاند- د ملالۍ حربي ښوونځي مسوولان وايي چې د نجونو په دغه ځانګړي مرکز کې د شمولیت د داوطالبانو شمېر دوه برابره شوی دی.
د ملالۍ حربي ښوونځي قوماندانه کبرا وايي، د دې ښوونځي له وروستي پړاوه ۱۴۶ نجونې فارغ التحصیل شوي او څه باندې ۳۰۰ نورې په ښوونځي کې شاملېدو ته انتظار باسي.
دا وايي چې د ملالۍ حربي ښوونځی محدود شمېر زده کوونکې مني، کنې په دغه ښوونځي کې د شمولیت غوښتونکې تر دې خورا ډېرې دي.
سره له دې چې افغانان د ښځو د تعلیم په تېره بیا په پوځي برخه کې له تنګ نظرۍ کار اخلي خو کبرا وايي چې لږترلږه د ملالۍ د حربي ښوونځي په برخه کې وضعیت داسي نه دی.
د دې په وینا د تېر کال په پرتله په دغه ښوونځي کې د شمولیت د تقاضاکوونکو شمېر دوه برابره زیات شوی دی.
په دغه ښوونځي کې زده کوونکو نجونو ته ۶ میاشتې روزنه ورکول کېږي.
حاضردمه د افغانستان په ملي اردو کېد ۲ پېلوټانو، ۴۰۰ برملانو او ۵۵۰ ضابطانو په ګډون ۱۶۰۰ ښځې شاملې دي.
دفاع وزارت غواړي چې په ملي اردو کې د ښځو شمېر ۲ زرو ته ورسوي.