۱۳۹۳/۱۱/۲۰
چارواکي وایي د میدان وردګو ولایت نرخ ولسوالۍ په صد مرده سیمه کې د تېرې یوې اونۍ په ترڅ کې ۱۴ تنه شکمن لیوني سپی داړلي دي .
د دغه ولایت د عامې روغتیا ریاست مرستیال ډاکټرخیال محمد نن (دوشنبه ) د میدان وردګو سرپرست والي په مشرۍ د ادارو د مسؤلینو ترمنځ په جوړه شوې غونډه کې وویل د تېرې اونۍ په ترڅ کې د شپږو ماشومانو په ګډون چې یوه انجلۍ هم په کې ده،۱۴ تنه د یوه سپي له لورې داړل شوي دي.
ده زیاته کړه،دوی یاد کسانو ته په مرکزي روغتون کې اړوند واکسین تطبیق کړی،ترڅو ورته په راتلوونکې کې کومه ستونزه رامنځته نشي .
د میدان وردګو سرپرست والي ښاغلي عبدالمجید خوږیاڼي د عامې روغتیا ریاست له مسؤلینو مننه وکړه،چې په ټاکلې وخت کې یې هغه کسانو ته واکسین کړی،چې د سپي له لورې داړل شوي وو.
ده همدا راز د عامې روغتیا ریاست په مشرۍ،د چاپیریال ساتنې او ښاروالۍ مسؤلینو ته لارښوونه وکړه،چې د په یاده سیمه کې د لیونیو سپيو د لمنځه وړلو په موخه ژر تر ژره کمپاین ترسره کړي .
د میدان وردګو ولایت مطبوعاتي دفتر