تاند- په ننګرهار کې د تېلو په یوه ټانکر کې د چاودنې له کبله لږترلږه دوه تنه وژل شوي او په لسګونو دوکانونه سوځېدلي دي.
دا پېښه نن سهار وختي د تورخم – جلال اباد په لویه لاره کې هغه مهال وشوه چې په ټانکر پورې نښلول شوی مقناطیسي بم وچاودېده.
د ننګرهار د والي ویندوی عطا الله خوږیاڼی په پېښه کې د دوو تنو وژل کېدل تاییدوي.
ده همداراز وویل چې په چاودنه کې تر ۳۰ زیات دوکانونه سوځېدلي دي.
تراوسه کومې ترهګرې ډلې د دې برید مسوولیت په غاړه نه دی اخیستی.
په ننګرهار کې داعش او طالبان دواړه فعال دي.
دا چاودنه داسې وخت وشوه چې په ننګرهار کې د دولت د وسله والو مخالفانو پر ضد د امنیتي ځواکونو عملیات روان دي.