تاند- په بلوچستان کې د هغه ټکسي چلوونکي د وژلو په خاطر د امریکا خلاف رسمي شکایت درج شوی چې د طالبانو له مشر ملا اختر محمد منصور سره یوځای د امریکا د بې پېلوټه الوتکې په برید کې ووژل شو.
ټکسي چلوونکي محمد اعظم د مې په ۲۱ مه د ایران په پوله کې د تفتان له بندره ولي محمد (ملا منصور) کوټې ته بېوه چې د امریکا بې پېلوټه الوتکو د بلوچستان ایالت په نوشکي سیمه کې پرې برید وکړ. په برید کې د ټکسي چلوونکی او د طالبانو مشر وسوځېدل.
ملا اختر محمد منصور د ولي محمد په نوم پاکستاني شناختي کارد او پاسپورت جوړ کړي وو.
د محمد اعظم مشر ورور محمد قاسم په خپله عریضه کې ویلي چې امریکا د ده پر ورور د حملې مسوولیت منلی دی.
د محمد قاسم په عریضه کې د کوم ځانګړي امریکايي چارواکي نوم نه دی یاد شوی خو ویل شوي چې ده په خپل شکایت کې امریکايي چارواکي د خپل ورور په وژلو تورن کړي دي.
محمد قاسم وايي چې د مې په ۲۱مه ورته څرګنده شوه چې ورور یې په ټکسي موټر کې له کومې پېښې سره مخامخ شوی دی. خو کله چې د پېښې ځای ته لاړ، ورته معلومه شوه چې ورور یې له یوې سپرلۍ سره سوځېدلي او د هغوی مړي کوټې ته وړل شوي دي.
ده په کوټه کې د خپل ورور د مړي له پېژندلو وروسته جنازه تفتان ته یووړه او هلته یې خاورو ته وسپارله.
محمد قاسم وايي چې ورور یې بې ګناه و او بېوزله یتیمان ورڅخه پاتې دي.
ده په خپله عریضه کې غوښتنه کړې چې د بې پېلوټه الوتکو په حملې کې مسوول امریکايي چارواکي دې د قانون منګولو ته وسپارل شي.
کاش ستا عریضه ومنل شی رشتیا هم ستا ورور هیس کناه ته درلودل
دستا ورور سه چی د پاکستان تول هغه خلک هم پکی وسوزیگی چی سوک له ترهگرو حخه ملاتر کوی