تاند- وسله والو طالبانو نن په هلمند کې د افغان امنیتي ځواکونو پر پوستو په بریدونو کې لږترلږه ۱۰ پولیس وژلي دي.
د اسوشیتید پریس خبري اژانش د راپور له مخې، په هلمند کې د ګډې همږغۍ د دفتر مسوول محمد اسماعیل هوتکي وویل، طالبانو په سنګین ولسوالۍ کې د پولیسو پر لسو پوستو بریدونه وکړل، درې پوستې یې ونیولې او حملې ته یې دوام ورکړ.
د هوتکي په وینا په دې حملو کې ۱۰ پولیس وژل شوي او ۱۶ نور ژوبل دي.
خو د سنګین مرستیال امنیه قومندان حاجي باري وايي چې د ۱۳ پولیسو مړي یې موندلي او ۱۵ نور ژوبل شوي دي.
باري وویل:«په سلو کې اتیا پوستې زموږ په کنټرول کې دي او اوس په دوو پوستو کې له طالبانو سره نښته روانه ده.»
ده دا هم وویل چې د حمله کوونکو طالبانو شمېر زیات دی او خپل ټول وس کاروي.
په همدې حال کې راپورونه وايي چې د هلمند په مارجې او د اروزګان په دهرات ولسوالیو کې هم نښتې روانې دي.