تاند- د ناټو په مشرۍ نړیوال ايتلاف نن /سې شنبه/ وویل چې په هلمند ولایت کې یو امریکايپي پوځي د ګزمې په مهال وژل شوی او بل ټپي شوی دی.
ناټو ځواکونو په یوه خبرپاڼه کې ویلي چې دا پوځي په لاره کې د ځای پر ځای شوي بم په چاودنه کې ووژل شو.
په خبرپاڼه کې د پېښې نور جزییات نه دي څرګند شوي.
خو افغان سرچینې وايي چې په دې پېښه کې ۶ افغان سرتېري هم ژوبل شوي دي.
امریکا پرون اعلان وکړ چې لشکرګاه ته یې ۱۰۰ تنه تازه دمه پوځیان لېږلي چې د طالبانو پر ضد په جګړه کې د افغان امنیتي ځواکونو ملاتړ وکړي.
له دغو سلو پوځیانو سره اوس په هلمند کې د امریکايي پوځیانو شمېر ۵۰۰ ته رسېږي.
دا په داسي حال کې ده چې پخوا په دغه ولایت کې شاوخوا ۳۰ زره امریکايي او امریکايي پوځیان ځای پر ځای ول.