د پکتیا ولایت په مرکز ګردیز ښار کې نن د کرکټ بورډ او پکتیا ولایت مسئولینو لخوا د کرکټ لوبغالي ودانیزې پروژې د بنسټ ډبره کیښودل شوه. په دغو مراسمو کې د افغانستان کرکټ بورډ عمومي رئیس نسیم الله دانش، د پکتیا والي نصرت ارسلا، د کرکټ بورډ اجراییوي رئیس شفیق الله ستانکزي، د عمومي ریاست مرستیالانو هر یو حاجي عزیزالله فضلي او تاج ملوک عالم، د ولایت مرستیالانو، د ولایتي شورا غړو، د کرکټ بورډ پرمختیایي څانګې مسئول داود بابر، د کورني کرکټ مسئول نظیم جار عبدالرحیم، د کرکټ ملي لوبډلې لوبغاړو هر یو نوروز منګل، نورعلي ځدراڼ، نجیب ځدراڼ او حشمت الله شهیدي، د رسنیو همکارانو او د کرکټ سلګونو مینه والو ونډه درلودله.
د کرکټ بورډ له تللي هیئت څخه د پکتیا ولایت د کرکټ مسئولینو او سلګونو مینه والو لپاره د تیرې په کوتل کې تود هرکلی وشو او د ولایت تر مقامه بدرګه شو.
د پکتیا کرکټ لوبغالی په ۳۴ جریبه ځمکه کې د کرکټ بورډ ادارې په مالي لګښت رغول کیږي. په دغه لوبغالي ټولټال ۱۶ میلیونه افغانۍ لګښت راځي چې د نړیوال معیار ټولې اسانتیاوې او روزنیزه اکاډمي به پکې شتون ولري.
د افغانستان کرکټ بورډ عمومي رئیس نسیم الله دانش د لوبغالي بنسټ ډبرې کیښودلو په مراسمو کې د جوړې شوې غونډې ګډونوالو ته ووییل چې، “ویاړم چې نن د جرګو او شملو وطن، پکتیا کې د یوه معیاري لوبغالي د بنسټ ډبره ږدم. دغه لوبغالی په یوه ډیر سټراټیژیک موقیعت کې رغول کیږي او ټول مالي لګښت به یې د کرکټ بورډ اداره ورکوي چې له ودانیدو سره به یې په دغه ولایت کې د لوبغاړو پرمخ شته ستونزې هوارې او د کرکټ بورډ اداره به یې هم د کورنیو لوبو لپاره وکاروي”.
د پکتیا والي نصرت ارسلا د کرکټ بورډ ادارې څخه مننه وکړه چې پرته له مالي ملاتړ کونکي یې په خپل لګښت سره د لوبغالي ودانیزو چارو ته ملا وتړله. نوموړي د لوبغالي جوړیدل په پکتیا ولایت کې د کرکټ د بهیر وده وبلله. همدارنګه، نوموړي د کرکټ بورډ له مسئولینو هم مننه وکړه چې پکتیا کې یې د لوبغالي رغولو لپاره نه ستړې کیدونکې هلې ځلې کړې دي.
د افغانستان کرکټ بورډ اجراییوي رئیس شفیق الله ستانکزي پکتیاوالو ته د دوی په ولایت کې د کرکټ دغې سترې ودانیزې پروژې د بنسټ ډبرې مبارکي ورکړه. نوموړي ووییل چې، ددغه لوبغالي په رغیدو سره به په پکتیا کې د کرکټ نوی فصل پرانستل شي او د لوبغاړي به د کرکټ یو اکاډمیک چاپیریال ته د کرکټ معیاري ودې لپاره لاسرسی ومومي.
د کرکټ بورډ عمومي ریاست مرستیال حاجي عزیزالله فضلي دغه پروژه یوه ټولګټې پروژه وبلله. نوموړي د پکتیا ټول ولس ته ددغې پروژې د بنسټ ډبرې کیښودلو مبارکي ورکړه او دوی ته یې ډاډګیرنه ورکړه چې د کار کیفیت به له هره اړخه مسلکي وي.
د غونډې په ترڅ کې د پکتیا ولایتي شورا رئیس هم وینا واوروله او د دغه لوبغالي ودانیزې پروژې د کار د پیل له امله یې د کرکټ بورډ ادارې څخه مننه وکړه.
په پای کې د ولایت مسئولینو لخوا د کرکټ بورډ مسئولینو، تللي هیئت او ملي لوبډلې لوبغاړو ته ستاینلیکونه او لونګۍ هم ورکړل شوې.
این یک قدم نیک است ما بسیار تشکری میکنیم از کرکت بورد افغانستان این یک خبر خوش برای جوانان پکتیا میباشد