تاند- د پکتیکا ولایت چارواکي وايي چې د دغه ولایت د زېړوک ولسوالۍ پر پوستو د کورنیو او بهرنیو وسله والو سخت دریځو په برید کې لږترلږه ۴۳ وسله وال مخالفان وژل شوي دي.
د پکتیکا د والي ویندوی مخلص افغان وویل، تېره شپه یوه بجه کورنیو او بهرنیو وسله والو طالبانو په زېړوک ولسوالۍ کې د افغانستان پر امنیتي پوستو برید وکړ چې دوه ساعته یې دوام وکړ.
د افغان په وینا د جګړې په لومړي یو ساعت کې ۲۵ وسله وال مخالفان ووژل شول او ۷ نور ژوبل شول.
د پکتیکا د والي ویندوی په دې نښته کې دولتي ځواکونو ته د اوښتو مرګ ژوبلو په اړه وویل چې د ملي اردو ۲ پولیس او د ملي اردو ۲ سرتېری ووژل شول.
مخلص افغان وايي چې د جګړې په دوهم ساعت کې سیمې ته هوايي مرسته ورسېده او د بمبارۍ په نتیجه کې د دولت ۱۸ نور وسله وال مخالفان ووژل شول او ۴ ټپیان شول.
د مخلص افغان په وینا په دې جګړه کې، چې د شپې په ۱ بجه پیل شوې وه او د سهار تر ۳ بجو یې دوام وکړ ټولټال ۴۳ وسله وال مخالفان ووژل شول او مړي یې د زېړوک ولسوالۍ په ختیځ کې د ډبوک په غرنۍ سیمه کې پراته دي.
ده په جګړه کې د افغان امنیتي ځواکونو ټول تلفات ۴ تنه وبلل.
وسله والو طالبانو په دې اړه څه نه دي ویلي. د پېښې سیمه تر دې ډېره لېرې ده چې ازاد خبریالان هلته لاړ شي او په مستقل ډول یې تایید کړي.