تاند- د کابل ښار د نن ورځې له درېمې حملې د کورنیو چارو وزارت یو جګپوړی چارواکی روغ ووت.
نن شپه ناوخته په هغه چاودنه کې، چې د پلازمېنې په اتمه ناحیه کې وشوه، د کورنیو چارو وزارت د سپورت د څانګې رييس خوشال سروري په نښه شو.
تراوسه پوري څرګنده نه ده چې دا چاودنه بمي وه او که ځانمرګې حمله. خو راپورونه وايي چې د چاودنې په اثر لږترلږه یو تن ټپي شوی دی.
په سیمه کې ځیني شاهدان وايي چې د خوشال سروري کور ته نژدې بم اېښودل شوی و او ځیني نور بیا اټکل کوي چې چاودنه د مقناطیسي بم وه.
تر دې مخکې نن د کابل په دېوان بیګي سیمه کې د سترې محکمې د دارالانشا رييس ترور شو، ورپسې د پلازمېنې په بریکوټ سیمه کې د ملي اردو پر یوه بس ځانمرګی برید وشو چې شپږ تنه پکې ووژل شول او لس نور ژوبل شول.
طالبانو د دواړو حملو مسوولیت په غاړه اخیستی دی. د طالبانو یوه ویندوی ذبیح الله مجاهد ویلي چې په بس کې یې ۲۵ تنه وژلي دي.
له دې حملو جلا په هلمند کې طالبانو ۱۲ ماین پاکان ووژل، ۹ یې ټپیان او یو شمېر نور یې له ځان سره بېولي دي.
طالبانو د هلمند د حملې مسوولیت هم په غاړه اخیستی دی خو ویلي یې دي چې دولتي ماین پاکان یې وژلي دي.