تاند، یکشنبه، د قوس ۱۷مه: په پکتیا کې د شپږ میلیون ډالرو په ارزښت د جلغوزې د پروسس یوه معیاري فابریکه جوړېږي.
په دې فابریکه کې چې په ۲۴ ساعتونو کې به د ۵ متریک ټنه جلغوزې د پروسس ظرفیت ولري، شاوخا زر تنه به په کې په کار بوخت شي.
د حاجي محمد ګردېزي په نوم د دغې فابریکې جوړوونکی پانګه وال تاند ته وايي، دا فابریکه به په کار کې د ۶۰ زره متریک ټنه جلغوزې د پروسس ظرفیت ولري او همدا اوس یې سلګونه کسان په تعمیراتي چارو بوخت دي: (( په فابریکه کې به ډېر ژر د دریو لویو ماشینونو نصب چارې به ډېرې ژر پيل شي.))
نوموړی وايي، پخوا به د پروسس لپاره د خوست، پکتیکا او پکتیا جلغوزې پاکستان ته استول کېدې، خو اوس به د دغو ولایتونو د جلغوزې د پروسس او بسته بندۍ اړتیا په کور دننه پوره کېږي.
بلخوا د پکتیا د سوداګرۍ رئیس عبدالناصر عالمیار تاند ته وايي، چې دا فابریکه چې په کال کې به ۶۰ زره ټنه جلغوزه پروسس او بسته بندي کوي، د سیمې د جلغوزه ټولوونکو او سوداګرو لپاره ښه زېری دی.
دا په داسې حال کې ده چې افغانستان په دې وروستیو کې هند، چین او نورو هیوادونو ته د هوايي دهلېزونو له لارې د افغاني جلغوزې صادرات زیات کړي او په نړیوال بازار کې یې ځانګړی ځای خپل کړی دی.
ډیر خوشلوونکی خبر. د جلغوزې په بستو د پښتو ولیکي، د ګوانتانامو ژبه دې بیرته جلغوزو ته راولي. حقانیانو و پړه قانیانو خو د جلغوزې ژپه زندانونو ته یووړه، جلغوزه به یې انشالله بیرته راخپلوي او بیا به یې له ځانه سره دنړۍ پایتختونو د شاهانو تر قصرونو تر طلایي میزونو پورې بیایي
ژوندۍ د وي جلغوزه او د جلغوزې دوستان
ښه خبر دی، خو دا نوم یې پښتو کې جلغوزه نه دی، ځنغوزي یا ځڼغوزي دی، ښايي متونونو کې ورته پام وشي.