تاند- ځانګړو افغان ځواکونو په کندوز او بغلان ولایتونو کې د طالبانو محبسونو حمله وکړه او ۴۷ بندیان یې ورڅخه خوشي کړل.
دا په وروستیو څه کم لسو ورځو کې د طالبانو پر محبسونو د ځانګړو ځواکونو څلورمه حمله ده.
د ځانګړو ځواکونو قول اردو نن په یوه خبرپاڼه کې ویلي چې کومانډو ځواکونو تېره شپه د کندوز په اقتاش سیمه کې د طالبانو پر محبس چاپه واچوله او له هغه څخه یې ۱۳ بندیان خوشي کړل.
همداراز ځانګړو ځواکونو د بغلان ولایت په مرکزي بغلان ولسوالي کې د طالبانو پر بند د چاپې په ترڅ کې ۳۴ بندیان خوشي کړي دي.
طالبانو تراوسه پورې په دې اړه څه نه دي ویلي. خو دې ډلې تر دې مخکې پر محبسونو د ځانګړو ځواکونو یو شمېر حملې تایید کړي دي.
په وروستیو کې د طالبانو پر محبسونو د ځانګړو ځواکونو حملې زیاتې شوي دي.
تېره اوونۍ (جون ۶) ځانګړو ځواکونو د فاریاب د قیصار ولسوالي په شاخ سیمه کې د طالبانو پر یوه محبس په حمله کې تر ۸۰ زیات بندیان خوشي کړل.
دغو ځواکونو په همدې ورځ په پکتیا کې یو بندي خوشي کړ او د جون په دوهمه یې د غور په پسابند کې ۱۸ اسیران وژغورل.