تاند- د چين د بهرنيو چارو وزارت په يوه اعلاميه کې نن پنج شنبه وويل، چې چين، روسيې او هند نن د افغانستان پر وضعيت خبرې وکړې.
دغه درې اړخيزه غونډه د چين د بهرنيو چارو وزارت د مرستيال ليو ژينمين په کوربه توب جوړه شوې وه، چې د روسيې د امنيت شورا مرستيال يوګيني لوکيانوف او د هند د ملي امنيت سلاکار نيهچل ساندو په کې برخه درلوده.
درې واړه لوريو د افغانستان او سيمې پر وضعيت په خپلو کې خبرې وکړې. دوى موافقه وکړه، چې د افغانستان د سولې او امنيت اړوند پرمختګونه به له نژدې څاري.
چين، روسيه او هند افغانستان ته نژدې پراته هېوادونه دي، دغه هېوادونه وايي د افغانستان د بيارغونې او پخلاينې د پروسې ملاتړ کوي.
په دغو هېوادونو کې هند هغه هېواد دى، چې د افغانستان له بيارغونې سره يې د مليونونو ډالرو مرسته کړې ده.
د سيمې دغه هېوادونه په داسې حال کې په خپلو کې د افغانستان په اړه جرګه کېږي چې د کابل او واشنګټن ترمنځ د امنيتي او دفاعي تړون د نه لاسليکېدو له کبله د افغانستان او امريکا اړيکې ترينګلې دي.
د دغو هېوادونو ترمنځ کړکېچ وروسته تر هغه لا پسې زيات شو، چې د پروان په سياه ګرد ولسوالۍ کې د بهرنيو ځواکونو بمبارۍ د يوې ښځې تر څنګ اووه ماشومان ووژل.
په همدې حال کې نن په هند کې د افغانستان په اړه د تماس نړيوالې ډلې غونډه هم جوړه شوه.
ټاکل شوې د جمعې په ورځ د اسيا زړه هېوادونو کنفرانس د هند په پلازمېنه نوي ډيلي کې جوړه شي.
په دې غونډه کې به د افغانستان او د سيمې د هېوادونو ترمنځ پر اقتصادي راکړه ورکړه، د افغانستان پر ثبات او راتلونکوانتخاباتو خبرې وشي.