تاند، جمعه، د دلوې ۱۸مه: په کابل کې د چین سفارت وایي، هیواد یې افغانستان ته د کرونا ویروس د رسیدو د مخنیوي لپاره هر ډول هڅې کوي.
په کابل کې د چین سفیر وانګیو د د باندنیو چارو وزارت له سرپرست هارون چخانسوري سره لیدنه کې ویلي چې له کرونا ناروغۍ څخه د اغیزمنو کسانو د درملنې کچه مخ په لوړېدو ده.
وانګیو نن په دې اړه یو ټویټ کې ویلي، چې له چخانسوري سره یې د کرونا ویروس په اړه د نظر تبادله شوې ده: ((ما ورته وویل چې د درملنې کچه مخ په لوړېدو ده او دا چې له چین څخه بهر د تائید شوو قضیو شمېر په چین کې د ثبت شوو پېښو څخه یو سلنه لږ دی، موږ به افغانستان ته د کرونا ویروس مخنیوي لپاره خپلې ټولې هڅې وکړو.))
د چین سفیر پر داسې مهال دا څرګندونې کوی چې د افغانستان د عامې روغتیا وزارت هم د دغه ویروس د مخنیوي لپاره د جدي تدابیرو د نیولو خبر ورکړی دی.
په افغانستان کې تر دا مهاله د دغه ناروغۍ د ثبتېدو په اړه راپور نه دی ورکړل شوی خو په چین کې د کرونا ویروس له امله د وژل شوو کسانو شمېر ۶۴۰ تنو ته رسېدلی او د چین د ګاونډیو هیوادونو سره بېره یې ګڼې پېښې په کاناډا، امریکا، بریتانیا په ګډون ۲۹ هیوادونو کې ثبت شوي دي.