تاند- چین د لومړي ځل لپاره د افغانستان او پاکستان ترمنځ د ترینګلیو اړیکو د ښه کولو په خاطر منځګړتوب ته لېوالتیا ښکاره کړې ده.
د چین د بهرنیو چارو وزیر (یانګ يي) غواړي چې ژر کابل ته راشي او د سیمې په سوله او ثبات کې مهم رول ولوبوي.
د افغانستان او پاکستان اړیکې د وسله والو سختدریځو ډلو د ملاتړ په خاطر له کلونو راهیسې ښې نه دي خو په وروستیو کې لا خرابې شوي دي.
تر دې وړاندې امریکا او بریتانیا هم د افغانستان او پاکستان د اړیکو د ښه کولو او په نتیجه کې یې له تروریزم سره مبارزې ته د پاکستان د هڅولو لپاره ډېرې هڅې کړي خو نتیجه یې نه ده لرلې.
د افغانستان ولسمشر محمد اشرف غني په کابل کې یوې غونډې ته وویل«د لومړي ځل لپاره چین غواړي چې د افغانستان د سولې په پروسه کې منځګړی واوسي او ژر به د چین د بهرنیو چارو وزیر کابل ته راشي. له پاکستان سره سوله زموږ غوښتنه ده او باید د دوو حکومتونو ترمنځ سوله وشي.»
د ولسمشر غني له څرګندونو وروسته ارګ نن /سې شنبه/ په یوه رسمي خبرپاڼه کې تایید کړه چې د چین د بهرنیو چارو وزیر ښاغلی وانګ کابل ته راځي.
په خبرپاڼه کې کابل ته د چینايي وزیر د راتګ د نېټې یادونه نه ده شوې.
ټاکل شوې ده چې ښاغلی وانګ د افغانستان، پاکستان، امریکا او چین د څلور اړخیزو خبرو د بهیر د بیا پیلېدو چارې همږغې کړي.
دا پروسه په ۲۰۱۶ م کال وروسته له دې ناکامه شوه چې پاکستان له وعدې سره سره طالبان نه سولې ته حاضر کړل او نه یې له خپلې خاورې وایستل.