تاند- د افغانستان د حکومت سرچینې وايي چې د دوو برخو یعني امنیتي او اقتصادي چارو وزیران به د لندن تر کنفرانس مخکې معرفي شي.
د عبدالله عبدالله ویندویان وايي چې اجرايي رييس له ولسمشر منظمې غونډې کوي او د کابینې د وزیرانو د معرفي کولو په باب ورسره خبرې کوي.
ولسمشرغني د لوړې په مراسمو کې ویلي و چې په ۴۵ ورځو کې به نوې کابینه معرفي کړي خو اوس له هغې نېټې پنځه ورځې اوښتي دي.
خو اوس هڅه روانه ده چې د اقتصاد، مالیې، سوداګرۍ، کورنیو چارو او دفاع وزیران معرفي شي. دا هغه وزارتونه دي چې دواړو خواوو په موافقې کې یاد کړي وو. د اشرف غني او عبدالله عبدالله له موافقې سره سم دا وزیران باید دواړه خواوې نیم په نیمه معرفي کړي.
دا وزیران به د لندن تر کنفرانس مخکې معرفي شي. د لندن کنفرانس د راتلونکې دسمبر په لومړیو کې جوړېږي.
په همدې حال کې د ولسي جرګې غړي وايي چې سرپرست وزیران باید تر دوو میاشتو زیات په دنده پاتې نه شي ځکه چې له قانون سره سم وزیران یوازې دوه میاشتې سرپرستي کولی شي.