ښه ده چې عثمان غني پکتیاوال او ننګرهاری نه دی

(محمدرحیم سکندر)

داخبره که عثمان غني کړې وي او کنه ! خوډېری خلک په دې اند دي چې په افغانستان کې دا قبیله پالن ، سمت پرستۍ او ضدونه له ډېر پخوانه یو عادت ګرځیدلی چې یو څوک خپل قاموال او سیمه وال هغه که دسیاست ، فرهنګ ، سپورت او یانورو برخو کې ځلیږي او یا نه ! خو دخپلې سیمې خلک یې په داسې ډول ستايي چې دبل ولایت یا بل لوری په سپکو سپورو یادوي ، تر دې چې دخپل ولایت دیوې اوبلې ولسوالۍ هم وي . کله چې دافغانستان دکرکټ ملي لوبډله راښکاره شویده اکثره لوبغاړي یې دپکتیا او ننګرهار اوسیدونکي دي ، دوی له اوله تر اوسه دیوه اوبل ولایت خلک د خپلې او د بلې سیمې لوبغاړي داسې بولي لکه د یو اوبل هیواد لوبغاړي چې وي ، خوستیان په شاپور ځدراڼ ، نوروز منګل ، نورعلي ځدراڼ ، دولت ځدران ، افسرځاځي نجیب ځدراڼ … داسې بې مورده ګرم بحثونه راباندې کړي وي چې دکریم صادق ، شهزاد محمدي افتاب عالم ، حمیدحسن او سمع الله شینواری داسې هم نه بولي چې دوی دافغانستان دکرکټ ملي لوبډلې لوبغاړي دي او که پنجابیان دي .

همدغه راز ننګرهاریانو له هغې خوانه توپونه راباندې کړي وي په پکتیا والو پسې بد رد وايي . د راډیوګانو په کمینټریو کې معلومداره پلوي کیږي چې له ژورنالیزمه یې ډېران جوړکړی ، ځینې خو یې دومره تعصب ګر دي چې د خپل قوم لوبغاړی یې په لوبه کې سمه کاکردګي ونه کړي او د بل ولایت او یا د بل قوم لوبغاړی سم وځلیږي نو کمینټري هم خوند نه ورکوي او ایله بیله ژاولې سره ژويي . که داخو له خپل قوم سره مینه وي نو زه خو نفرت ورنه ښه بولم او د دوی له بې معیاره قوم پرستۍ دلاسه به دې هغه لوبغاړی هم بد ویسیږي او ورته وبه وایې چې ته ورک شې ، قوم دې ورک شه اولوبغاړی دې ورک شه !!!!؟ تاسې پاکستانی پښتون لوبغاړی افریدي وګورئ چې یو وخت یې د لوبډلې کپټان و او اوس هم پوره احترام ورته لري او خپل لوبغاړي (لالا) ورته وايي ، څه فکر کوئ که مونږ ته یو فارسیوان لوبغاړی لوبې ته راشي څه حال به وي ؟ زه وایم چې له ګریوانه به یې ونیسي او له لوبډلې به یې په دیکو دیکو وباسي .

د ۲۰۱۵ پنځوس اوریز جام د تیاري لپاره چې له زمبابوې سره افغانستان لوبوې وې ، په یوه لوبه کې اصغر اونورعلي په انډه (صفر) سره له میدانه ووتل ؛ خو په فسبوک کې ځینو شرخوټوونکو په نورعلي پسې لیکلي وو چې (۳۳) منډې یې جوړې کړې او بل په اصغر پسې لیکلي وو چې پنځوسیزه یې ووهله ، تاسې خپله اوس پریکړه وکړئ چې دا قوم پرستي ده او جنګ پرستي ده ؟؟ اوس ویلی شو : ښه ده چې عثمان غني پکتیاوال او یا ننګرهاری نه دی ، ګني په دې به هم دوی سره مات کړي وای ، که له دوی څخه دیو قوم نوم یې په ځان ایښی وای نو ویلی به یې چې زمونږ غني په اوله رسمي لوبه کې (۷۰) منډې جوړې کړې او یوه یې ویکټ هم واخیسته او د زمبابوې پر خلا ف یې سلیزه ووهله چې داسیا په کچه دوهم نمر مقام وګاټه (( اول شاهد افریدي په ۱۶ کلنۍ کې سلیزه ووهله ، دوهم مقام له غني سره دی چې په کم عمر کې یې سلیزه ووهله او دریم مقام له عمران نظیر سره دی چې په ۱۸ کلنۍ کې یې سلیزه وهلې وه )) او بل به بیا سرچپه خبرې کولې چې نه ! بالونه ډېر مېس کړل ، نه ! هسې کله کله خو داسې هر څوک ځلیږي او پلانه ده اوډینګه ده دا به مو ویل . اوس که عثمان غني په دریو لوبو کې سرپه سر په صفر هم وسوځیږي بیا هم یو فعال کرکټر دی ، ددې کمنیتیو له وجه خوافغانستان هم ځکه پرمختګ نه شي کولئ . بیا هم وایو : ښه ده چې عثمان غني ننګرهاری او پکتیاوال نه دی .

که څه هم تخلص ګټه لري او خپل قوم مشهوروي ؛ خو کله کله داسې هم کیږي چې یو لوبغاړی دخلکو بد ایسیږي نو ټول کوم یې دهغه په سر ښه نه ورباندې لګیږي او یا په یو چا یو قوم بد لګیږي نو دهغه قوم لوبغاړی یې هم ښه نه ایسیږي دا کنجوسۍ او داسې خبرې په وروسته پاتې ټولنو کې ډېرې وي سمې مو سترګې نه وي غړیدلې بیا دیو او بل له پښو څخه تیږې وباسو ((نن شوې په نغن شوې)) . اوس هم ټول یو افغانستان دی ، مونږ لکه څنګه چې دکرکټ ملي لوبډله لرو همداسې باید ملي فکر هم ولرو هر څوک دافغانستان لپاره لوبیږي فقط دافغانستان دی مونږ ته ننګرهار او پکیتا نه ده مهمه مونږ باید یوه کوچني ولایت په سطحه لنډ فکر ونه لرو بلکې ټول شموله فکر ولرو .

مهمه داده که هر لوبغاړی لوبه وګتي خو مونږ وایو چې افغانستان لوبه وګټله نه دا چې ووایو غني لوبه وګټله همداشان هر هیواد چې لوبه وګټي هغه هیواد یادیږي .

عثمان غني د ننګرهار د شېرزاد ولسوالۍ دی نوموړی د ۱۹۹۶ ميلادي کال د نومبر په ۲۰مه نېټه زېږېدلی دی،
اوس مهال په پېښور کې اوسیږي (زنده بادافغانستان)