تاند، چهار شنبه، د عقرب ۱۵مه: د افغانستان د بهرنیو چارو وزارت سرچینې تاند ته وايي، حکومت پر ناړۍ ولسوالۍ د پاکستان بریدونو، د آی ایس آی لخوا د کابل د سفیر احضار او په کابل کې د پاکستان د سفارت بندېدو د موضوعاتو له کبله په دې غور کوي چې لنډو ورځو کې په کابل کې د پاکستان سفیر احضار کړي.
سرچینه وايي، له پاکستان څخه یې وضاحت غوښتی دی چې ولې د آی ایس آی د مشر لخوا افغان سفیر د هغه دفتر ته ورغوښتل شوی او ناوړه چلند ورسره شوی دی؟
سرچینه همدا راز وايي، له عاطف مشعل سره به هم د دې خبرې حساب وشي چې ولې د پوځ دفتر ته ورغلی او د هغوی غوښتنه یې په داسې حال کې منلې چې ټول دیپلوماتیک اداب یې پخپله تر پښو لاندې کړي دي.
دا په داسې حال کې ده چې د افغان حکومت او پاکستان تر منځ په دې وروستیو کې اړیکې ترینګلې شوي او پاکستان په ناڅاپي ډول له دریو ورځو راهیسې په کابل کې خپل سفارت تړلی دی.