تازه تعقیب: تاند، سه شنبه، د سنبلې ۱۲مه: کورنیو چارو وزارت د کابل نهمې حوزې اړوند قابل بای کې د بهرنیانو پر ګرین ویلیج کمپ باندې د ټراکټور بم چاودنې مړي ۱۶ او ټپیان ۱۱۹ کسه اعلان کړل.
د کورنیو چارو وزارت ویاند نصرت رحیمي تاند ته وویل، پیښه بیګاه شپه پنځه کم لس بجې د ولسي کورونو تر منځ پر ګرین ویلیج کمپ شوې چې له کبله یې نږدې د تېلو ټانک هم اور اخیستی او شاوخوا کورونو ته یې هم درانه زیانونه اړولي دي: ((پيښه کې ۱۶ کسان وژل شوي چې د کمپ کارکوونکي هم په کې شته، دغه راز شاوخوا کورونو کې ۱۱۹ کسان ټپیان شوي دي.))
د رحیمي په خبره پولیسو سیمه کې پټ پنځه ځانمرګي طالبان هم پیدا او نیولي دي چې غوښتل یې له چاودنې وروسته کمپ ته ور ننوځي: (( ګرین ویلیج د بهرنیانو مېلمستون دی، موږ پر وخت ځان ور رسولی او نږدې ۴۰۰ میلمانه مو ژغورلي دي، د دې پيښې تاوان بیا هم ولسي وګړو ته زیات اوښتی.))
طالبان د دغه برید پړه پر غاړه اخیستې په داسې حال کې چې تېر ژمي کې یې هم پر دغه کمپ باندې موټر بم برید کې لسګونه ولسي وګړي وژلي وو.