تاند، یکشنبه، د حمل ۱۰مه: د کابل امنیه قومندانۍ پولیسو یو کس نیولی چې غوښتل یې د کانالیزسیون له لارې د کابل د اسعارو د تبادلې مرکز، د شهزاده سرای ته د پیسو د غلا په موخه دننه شي.
سرای شهزاده د افغانستان په کچه د پیسو د راکړې ورکړې تر ټولو ستر او مهم ځای بلل کېږي، چې اوس مهال د کورونا ویروس د مخنیوي په پار بند دی.
د کورنیو چارو وزارت ویاند طارق ارین تاند ته د دغه غل نیونه تایید کړه او وايي، تېره شپه یو کس هڅه کوله چې ډېر په هوښیارۍ سره د کانالیزسیون له لارې دغه سرای ته دننه شي او پیسي غلا کړي چې د پولیسو لخوا ونیول شو.
طارق ارین زیاتوي چې یاد کس له یو شمېر لاسي وسایلو سره د سرای شهزاده کانالیزسیون سلولونو ته دننه شوی او غوښتل یې چې د پیسو د راکړې ورکړې دغه لوی انګړ ته دننه شي، خو د پولیسو له لوري ونیول شوه.
نیول شوي کس منلې چې غوښتل یې سرای شهزاده ته د پیسو د غلا لپاره دننه شي.
شهزاده سرای چې د کورونا له وېرې له څو ورځو راهیسې تړل شوی، د صرافانو ټولنه یې وایي، له حکومت سره یې مشوره کړې چې په لنډو ورځو کې دا سرای بیرته د کورونا له جدي تدابیرو سره پرانیزي.
د صرافانو په وینا د صرافۍ بندیدو له کبله د پیسو راکړه ورکړه له ستونزو سره مخ شوې او دوی ته هم هره ورځ درانه مالي زیانونه اوړي.