تاند، سه شنبه، د میزان ۹مه: د ټاکنو کمېسیون اعلان کړه چې سږنیو ولسمشریزو ټاکنو کې له ۲ میلیونو او ۵۰۰ زرو څه زیاتو کسانو رایه کارولې او دا شمېرې شاید بدلون هم ومومي.
د ټاکنو کمېسیون نن مازیګر په یوه خبري غونډه کې وویل، سږ کال په ۴۳۸۴ مرکزونو کې دوه میلیونه، ۵۶۹ زره او ۵۴۵ کسانو رایه کارولې ده، خو د ۳۷۲ مرکزونو رایې لا پاتې دي.
د کمېسیون غړی سید عصمت الله مل وايي ، تر ټولو زیاتې رایې په کابل، ننګرهار، کندهار، هرات، بغلان، پکتیا، دایکندي او خوست کې کارول شوې دي، خو تر ټولو کمه رایه په ارزګان ولایت کې صندوقونو ته لوېدلې ده: ((په کابل کې ۴۵۸ زره او ۵۴۹ کسانو رایې ورکړې دي خو په ارزګان کې بیا ۵۸۵۶ رایې کارول شوې دي.))
د کمېسیون بل غړی مولانا عبدالله بیا وايي، په ټول افغانستان کې د رایو د پرانیستو مرکزونو شمېر ۴۶۶۹ و، چې په ۴۴۶۶ مرکزونو کې رایې کارول شوې دي او په ۲۸۵ مرکزونو کې هیڅ رایه نه ده غورځېدلې: (( موږ ته یوازې بایومتریک شوې رایې معتبرې دي، باقي نورې رایې نه شمېرو او له پاکو رایو به یې جلا کړو.))
دا په داسې حال کې ده چې د مشرانو جرګې رئیس بیا ویلي، بې بایومتریکه رایې به د ټآکنو د کمېسیون په پلار هم وشمېري.
خو د ټاکنو د کمېسیون غړی مولانا عبدالله یې بیا په غبرګون ویلي، دی فکر نه کوي چې یو مسوول انسان دا ډول خبره وکړي.