خبرپاڼه
کندهار، افغانستان- کندهار والي د يوې غونډي پر مهال د دغه ولايت د تاريخي ابداتو پر ساتني ټينګار وکړ.
په هغه غونډه کي چي، نن د کندهار والي د کار په دفتر کي جوړه سوې وه، د کندهار والي پوهاند ډاکټر توريالي ويسا تر څنګ مرستيال والي عبدالقديم پتيال، ښاروال قاضي محمدعمر عمر، د اطلاعاتو او کلتور رئيس او د والي سرپرست وياند دواخان مينه پال، د ښاروالۍ مرستيال محمد نسيم رضايي، د مځکو د خپلواکي ادارې امر نورالله نوري، د کادستر امر سردارمحمد او د عدليې رئيس عاقل شاه خان ګډون کړى وو.
کندهار والي پوهاند ډاکټر توريالي ويسا ټينګار وکړ چي د کندهار د تاريخي ابداتو ساتنه دي په جدي ډول وسي. ښاغلي ويسا زياته کړه، د نارنج ماڼۍ په ساحه کي به د جوړو سوو ودانيو پلټنه وکړي، تر څو معلومه کړي چي دا ودانۍ پر کوم اساس جوړي سوي او مځکه يې د چا له لوري غصب سوې ده. نوموړي وويل: “موږ هيچا ته دا حق نه ورکوو چي د کندهار تاريخي ابداتو ته دي زيان ورسوي، موږ به په ډېر جدي ډول د تاريخي ابداتو ساتنه وکړو. د دې پلټنه به وکړو چي د نارنج ماڼۍ په اړونده ساحه کي چا او ولي ودانۍ جوړي کړي دي.” د والي په خبره، تاريخي ابدات دي چي د هېواد د لرغونتوب او فرهنګ څرګندويي کوي.
د غونډي په پاى کي د کندهار والي له لوري هيئت وټاکل سو، تر څو د نارنج ماڼۍ اسناد او نقشه له نژدې وپلټي. هئيت له نارنج ماڼۍ څخه ليدنه وکړه او تر ليدني وروسته د هيئت په استازيتوب د مځکو د خپلواکي ادارې امر نورالله نوري وويل، چي له نارنج ماڼۍ څخه يې له نژدې ليدنه وکړه او د پلټنو په پايله کي معلومه سوه چي د نارنج ماڼۍ په حدود اربعه کي ډېري دولتي مځکي غصب سوي او د غصب کېدو په حال کي دي. په ياده سيمه کي د شاولي په نوم يو کس له حضرت شاه څخه مځکه رانيولې او غوښتل يې پر دې مځکي ودانۍ جوړه کړي. نوري زياته کړه، د ودانيو تر څنګ څه اندازه مځکه د کروندې لپاره هم اړول سوې ده. د نوري په خبره، دا مځکه د نارنج ماڼۍ په حدودو کي راځي، چي ژر تر ژره به يې د غصب مخه ونيسي. هغه زياته کړه، ډېر ژر به د دې پلټنه وکړي چي پر ياده مځکه ولي او څنګه جعلي قباله جوړه سوې ده. دا په داسي حال کي ده چي د شاولي په نوم يو کس د حضرت شاه په نوم يو کس څخه مځکه رانيولې او په دې سودا کي د يادي مځکي لپاره جعلي قباله جوړه سوې ده. نارنج ماڼۍ ۲۳۰۰ کاله مخکي هغه وخت چي مقدوني سکندر له يونانه راغى د ټول هيواد په کچه يې دوولس دا ډول ماڼۍ جوړي کړې چي د “سکندريه ماڼيو” په نوم يادېدې. پاته يوولس دا ډول تاريخي ماڼۍ په بشپړ ډول له منځه تللي او يوازي يې نارنج ماڼۍ پاته ده.