تاند، یکشنبه، د ثور ۷مه: د کندوز امنیتي چارواکي وايي، د کندوز په امام صاحب ولسوالۍ کې د یو کور اووه غړي تېره شپه په ډزو وژل شوي دي.
د کندوز د امنیه قومندانۍ ویاند هجرت الله اکبري د پېښې په تایید ویلي، وژل شوي کسان د یو کور غړي وو او تېره شپه پیشلمي مهال وژل شوي دي.
بلخوا تاند ته رسېدلي راپورونه ښيي چې په کندوز امام صاحب ولسوالۍ کې یو کور غړي لږ تر لږه د خپلې کورنۍ ۷ کسان وژلي دي.
د راپور په اساس د دوه وروڼو په جنجال کې یو ورور راپاڅېدلی شپږ وریرونه او ورور یې وژلی دی او دوه تنه نور یې ژوبل کړي دي.
ویل کېږي په وژل شویو کې د ۵، پنځو، ۷ او ۱۰ کلونو ماشومان شامل دي.
خو د کندوز د والي ویاند عصمت الله مرادي بیا تاند ته وايي، دا د دوه وروڼو تر منځ یوه حقوقي لانجه وه چې یو ورور په کې وسلې ته لاس کړی دی او د بل ورور د کور ۶ غړي یې وژلي دي.
نوموړی وايي، دا پېښه تېره شپه شوې ده او قاتل یې نیول شوی دی.