حامد حقمل
همدا اوس خپل خیالونه په عمل بدل کړئ! د «ته ګټونکی يې» کتاب د شېو کهرا اثر دی او تکړه ژونالیست او لیکوال شېرخان شهیر پښتو ژبې ته ژباړلی دی.
«ته ګټونکی یې» کتاب له یوې هر اړخیزې طرحې سره د داسې ژوند جوړولو لارښود دی چې تاسې یې لایق یاست.
ګټونکی، بایلونکی، بریالی، ماتيې خوړلی…. یوازې هغه عمومي او ورځنۍ تکراري کلیمې دي چې د کتابونو پر مخ لیکل شوې دي. کیدای شي ډېر ځله مو د دې عنوانونو کتابونه د کتاب پلوروځیو او فرهنګي بنسټونو د مخې په ښيښوکې لیدلي وي. ښایي دغه کلیمې مو د داسې پوسټرونو پر مخ لیدلي وي چې د سیمینارونو دایرولو ته پکې په همدې موضوع خبر ورکړل شوی وي. ښایي د دې کلیمو سره په هغه اندازه مخ شوي وی او اوس چې کله د کتاب پلورنځیو د مخې په ښیښو کې د «ته ګټونکی یې» کتاب وینئ، بې پروا یې له څنګه تېرېږئ او له ځان سره وایی بیا هم همغه پخوانۍ او دایمي کلیمي!
مګر نه، راځئ دا ځل د «ته ګټونکی یې» کتاب له څنګه بې پروا مه تېرېږئ او د هغې له شېبې شېبې څخه خوند واخلئ. که چېرته غواړئ چې په مسلکي، کورنيو او شخصي مسایلو کې بریالي و اوسئ، که چېرته غواړئ له هغې کړاوونو سره چې نن ورځ ورسره ډېر خلک مخ دي خلاصون پیدا کړئ او راتلونکي خلک مو په نېکۍ سره یاد کړي، کچېرې غواړۍ د یوه مدبر مدیر په شان چلند وکړئ او کچېرته مو هوډ نیولی وي چې د یو ګټونکي په توګه ژوند وکړئ، د دې کتاب د مطالعه کولو سپارښتنه درته کوم.
د «ته ګټونکی یې» کتاب د ښه والي څخه یو دا دی چې ژباړه یې په ډېره ساده ژبه شوېده او هر ډول خلک ترې مفهوم اخیستی شي. شېو کهرا په دې کتاب کې د مهمو او بنسټیزو مسایلو د بیانولو لپاره له جذابو او جالبو کیسو او د مشرانو له خبرو څخه استفاده کړېده چې بریالیتوب ته په رسېدو کې مهم رول لوبوي. په دې کتاب کې راټولې شوې موضوعګانې بې له شکه د مهمو او بنسټیزو مدیریتي لاملونو څخه دي؛ خو په هغه کچه ساده بیان شوې دي چې آن هغه کسان چې د پوهنتون زده کړې یې ندي کړې کولای شي له هغې څخه په آسانۍ ګټه پورته کړي او خپل شخصي، مسلکي او ټولنیز ژوند ته یو بل رنګ ور وبښي.