تاند- امریکايي جنرال جنرال جان کېمبل، چې په افغانستان کې د غوڅ ملاتړ د قوماندان په توګه یې ماموریت د چهارشنبې په ورځ پای ته ورسېد، په افغانستان کې د داعش یا اسلامي دولت د وسله والې سرزورې ډلې د غړیو شمېر د زرو او ۳ زرو ترمنځ اټکلوي.
جنرال کېمبل په عین حال کې خبرداری ورکوي چې داعش نه یوازې په نوره نړۍ بلکې افغانستان کې د جنګي کسانو د جلب و جذب توان لري.
ده وویل، سره له دې چې د داعش د غړیو شمېر د طالبانو په پرتله خورا لږ دی، په افغانستان کې د دې ډلې حضور د ډېرې اندېښنې وړ دی او د دې یو بل دلیل دی چې باید له طالبانو سره سوله وشي.
داعش د ۲۰۱۵ م کال په جنورۍ کې په افغانستان کې خپل حضور اعلان کړ. دې ډلې د پاکستاني طالبانو د اورکزو ایجنسۍ پخوانی مشر حافظ سعید خان د اسلامي دولت د خراسان ولایت مشر اعلان کړ. داعش افغانستان او پاکستان ته خراسان وايي.
دې ډلې په ننګرهار کې د خلافت په نوم راډیو جوړه کړه او په جلال اباد کې یې د پاکستان پر کونسلګرۍ د حملې هڅه وکړه.
په وروستیو کې افغان امنیتي ځواکونو په ننګرهار کې د داعش اصلي مرکز یعني اچین ولسوالي کاملاً تصفیه کړه.
د اچین ولسوالي د تصفیې په عملیاتو کې د داعش غړي سخت وځپل شول.
دې ته په پام چې یو شمېر وسله وال په هیڅ صورت روغه او سوله نه غواړي، وېره ده چې که د طالبانو مشران د افغانستان له حکومت سره سوله وکړي، دغو عناصرو ته به بله لار پاتې نه شي مګر دا چې له داعش سره یوځای شي.