تاند (دوشنبه، د دلوې ۷) د افغانستان لپاره د ملګروملتو ځانګړی استازی یاماموتو تادامیچي نن تهران ته لاړ.
د ایران مهر خبري اژانس وايي چې په افغانستان کې د ملګروملتو د مرستندوی دفتر مشر نن سهار په دې هدف تهران ته راغی چې له ایراني چارواکو سره د افغانستان پر وضعیت خبرې وکړي.
یاماموتو تهران ته تر روانېدو مخکې پرون (یکشنبه) په کابل کې د چین له سفیر سره د افغانستان د سولې پر پروسې خبرې وکړې.
همداراز ده تېره اوونۍ په قطر او دوبۍ کې د افغانستان د سولې لپاره د امریکا له ځانګړي استازي او طالب استازو سره کتلي وو.
وروسته له دې چې د جنورۍ په لومړیو کې امریکا د بغداد هوايي ډګر ته نژدې په یوه هوايي برید کې د ایران د سپاه پاسداران د قدس ځواک قوماندان جنرال قاسم سلیماني وواژه، داسې اندېښنې زیاتې شوې چې ممکن ایران د افغانستان د سولې په پروسه کې خنډ پېښ کړي. تهران ته د ملګروملتو د ځانګړي استازي سفر هم ښايي له دغو اندېښنو سره تړاو ولري.
په همدې منځ کې ځینې راپورونه وايي چې د طالبانو او امریکایانو ترمنځ د سولې موافقه د اوربند پر سر ځنډنۍ شوې ده. طالبان د تشدد له کموالي سره موافق دي خو اوربند نه مني خو امریکا د موافقې د لاسلیک لپاره د یوه شرط په توګه پر اوربند ټینګار کوي.
د طالبانو د قطر د دفتر ویندوی سهیل شاهین د پاکستان ډان ورځپاڼې ته ویلي و چې له امریکا سره به د سولې موافقه د روانې جنورۍ تر پایه لاسلیک شي. که څه هم د دې میاشتې پای ته رسېدا ته لا څلور ورځې پاتې دي خو داسې نه ښکاري چې په دومره لنډ وخت کې دې موافقه لاسلیک شي.