تاند- یوه پاکستانۍ ورځپاڼه ادعا کوي چې امریکا له طالبانو سره په خبرو کې په افغانستان کې د دایمي اډو غوښتنه کړې ده.
ایکسپریس تریبیون وايي، د طالبانو او امریکايي استازو ترمنځ د خبرواترو له جزییاتو یوې خبرې سرچینې ورته ویلي چې امریکا طالبانو ته ویلي، د دې لپاره چې د افغانستان له خاورې څخه بیا د امریکا او نورو لوېدیځو هیوادونو پر ضد کار وانخیستل شي، په افغانستان کې دایمي اډې غواړي.
ایکسپریس تریبیون وايي چې امریکا طالبانو ته ویلي چې د سولې په بدل کې به امریکا د افغانستان د پرمختګ لپاره ډېرې مالي مرستې وکړي.
ورځپاڼه زیاتوي، امریکايي استازو طالبانو ته دا هم ویلي چې په افغانستان کې به د امریکا اډې د افغانستان له امنیتي چارو یا د افغانستان له کورنیو شخړو سره کار نه لري او یوازینی هدف به یې د سیمې ثبات وي.
ایکسپریس تریبیون زیاتوي چې په افغانستان کې د امریکا دایمي اډې به د روسیې، چین او ایران له مخالفت سره مخامخ شي ځکه چې دا هیوادونه فکر کوي چې امریکا د افغانستان له خاورې څخه په سیمه کې د ستراتیژیکو هدفونو لپاره کار اخلي او اصلي هدف یې افغانستان نه دی.
امریکا او طالبانو تراوسه پورې په دې اړه څه نه دي ویلي.