تاند- افغان امنیتي ځواکونو په هلمند ولایت کې یو جرمنی تبعه د طالبانو د بم جوړولو پر یوه مرکز د حملې په ترڅ کې ونیوه.
رویټرز خبري اژانس وايي، که دا خبره تایید شي نو دا به یوه نادره پېښه وي ځکه چې تر دې وړاندې له طالبانو سره د اروپایانو د همکارۍ خبر نه و خپور شوی. که څه هم ګڼ لوېدیځوال له داعش یا اسلامي دولت ډلې سره په عراق او سوریه کې یوځای شوي دي.
د هلمند د والي ویندوی عمر ځواک وویل، له نیول شوي کس سره د جرمني د تابعیت اسناد موندل شوي دي.
ځواک همداراز وویل چې دغه جرمنی له دوو طالبانو سره د دوشنبې په شپه د هلمند ولایت د ګریشک په یوه حویلۍ کې ونیول شو.
د هلمند د والي ویندوی وايي چې له نیول شوي جرمني څخه پوښتنې ګروېږنې روانې دي خو لومړني تحقیقات ښيي چې دا کس طالبانو په زور نه دی راوستی او د دې ډلې لپاره یې د سړک د غاړې د بمونو په جوړولو کې مرسته کوله.
د جرمني د بهرنیو چارو وزارت یا په افغانستان کې د جرمني سفارت تراوسه پورې په دې اړه څه نه دي ویلي.
May be he was hired by Taliban,