د غبرګولي، جوزا ۱۳ مه ۱۳۹۸
خبریال: رفيع الله مندوخېل، اسلام اباد
په بلوچستان کې د کوټې – ږوب پر لويه لاره د تېرې شپې ترافيکي پېښه کې د يوې کورنۍ د پنځو تنو په شمول څلرويشت تنو ته مرګ ژوبله اوښتې ده. پېښه د کلاسيف الله ولسوالۍ په علي خېل نومي سيمه کې شوې ده.
د کلاسيف الله لېويز (ملېشه ځواک) چارواکي وايي، چې له کوټې ږوب ته تلونکي د سپرلیو موټر له مخالف لوري راتلونکې باروړونکې لارې سره ټکر کړی چې په نتيجه کې يې د يوې مېرمنې او څلور ماشومانو په شمول څوارلس تنه مړه شوي او لس نور ژوبل شوي دي. په مړو شويو کې د يوې کورنۍ پنځه غړي هم شامل دي چې د اختر لپاره له کوټې ږوب ته روان و. مړه او ټپيان د ږوب د کلي تکۍ، بادنزي او ملور اوسېدونکي دي.
په بلوچستان کې د کوټې او ږوب ترڅنګ پر ټولولويو لارو په تېره بيا د بلوچستان او سند ايالت ترمنځ پر غځېدلې لاره وخت په وخت خونړۍ ترافيکي پېښي رامنځته کېږي. او په کې هرکال سلګونه کسان خپل ژوند له لاسه ورکوي.
د ايالت د ترافيکو مسوولين وايي، چې زياتره ترافيکي پېښې د چلوونکيو د بې احتياطۍ او د عامه پوهاوي د نشتوالي له امله رامنځته کېږي. خو د ايالتي حکومت او د اړونده مسوولينو له لوري د پېښو د مخنیوي په موخه ګامونه نه دي اخيستل شوي. د سړکونو خراب وضعيت، د موټرچلوونکيو د مسووليت نه احساس او د ترافيکي اصولو نه مراعتول هم د ترافيکي پېښو د زياتوالي لاملونه ګڼل کېږي.
د پاکستان د موټروېزاوهای وېز پوليس وايي، چې په ترافيکې پېښو کې د ناامنۍ ترپېښو زيات کسان ژوند ساه ورکوي.