تاند- د نړیوال بانک استازو په اسلام اباد کې د افغانستان له سفیر عمرزاخېلوال سره د کابل- پېښور د لویې لارې د جوړېدو په اړه خبرې وکړې.
په اسلام اباد کې د افغانستان سفیر وايي، د نړیوال بانک استازو نن /پنجشنبه/ له ده سره په کتنه کې د کابل – پېښور د نوې څلور لاینه لویې لارې پر جزییاتو خبرې وکړې.
زاخېلوال وايي چې ده د دې لارې د جوړېدو ملاتړ وکړ ځکه چې د افغانستان دولت باور لري چې د هیوادونو ترمنځ د ارتباطاتو زیاتوالی نه یوازې د سیمې د سوکالۍ لپاره کلیدي رول لري بلکې د سیمې له ثبات او امنیت سره هم مرسته کوي.
ښاغلي زاخېلوال په دې اړه څه نه دي ویلي چې نړیوال بانک به کله پر دې پروژې کار پیل کړي.
د کابل – پېښور پر لویه لار له یوې خوا د موټرو ترافیک زیات دی او له بلې خوا دا سړک تنګ دی چې له کبله یې زیاتې ترافیکي پېښې کېږي.