تاند- د القاعده شبکې د پخواني مشر اسامه بن لادن لمسی ډیورنډ کرښې ته نژدې د امریکايي پوځیانو په عملیاتو کې وژل شوی دی.
د بریتانیا د انډیپندنټ ورځپاڼې د راپور له مخې، د بن لادن لمسی او د حمزه بن لادن زوی د امریکا په هوايي برید کې وژل شوی دی.
ورځپاڼه وايي چې القاعده شبکې په خپله تبلیغاتي ویبپاڼه (JIMF) کې د بن لادن د لمسي د وژل کېدا خبر تایید کړی دی.
د بن لادن زوی حمزه بن لادن پر خپل زوی هم اسامه نوم ایښی و.
د حمزه بن لادن په پیغام کې چې د القاعده په تبلیغاتي ویبپاڼه کې خپور شوی دی، ویل شوي «د اتل زوی، د زورړتیا د لمسي، د خپل زوی اسامه د شهادت په خاطر تاسو او ځان ته تسلیت وایم.»
د حمزه بن لادن په پیغام کې دې ته اشاره نه ده شوې چې د ده زوی چیري او یا څرنګه ووژل شو.
خو ځینې سرچینې وايي چې د بن لادن لمسی (اسامه) پر ډیورنډ کرښه د امریکا د هوايي ځواک په حمله کې وژل شوی دی.
العربیه تلویزیون بیا ویلي چې د حمزه بن لادن زوی د ناروغۍ له کبله مړ شوی دی. العربیه د نوموړي عمر ۱۲ کاله ښودلی دی. خو د اسامه له عکسه داسې نه ښکاري چې هغه دې ۱۲ کلن وي.