تاند- پیاز ډېر ګټور دي خو سپینول یې سخت کار دی په تېره بیا ډېر خلک په دې خاطر د پیازو سپینولو ته ځان نه شي ټینګولی چې سترګې یې ترخېږي او اوښکې کوي.
څېړونکو د دې ستونزې چاره کړې ده. د هافینګټن ورځپاڼې د راپور له مخې، په امریکا کې بېیر (Bayer) کمپنۍ د (Sunions) په نوم پیاز روزلي چې نه د چا سترګې ترخوي او نه اوښکې کوي.
ټاکل شوې ده چې دا پیاز ژر عام او تخم یې په درسته نړۍ کې خپور شي.
دSunions پیازو تولیدوونکي وايي چې د دغو پیازو په جنیټیک کې بدلون نه دی راوړل شوی.
په تېرو کلونو کې په ګوګل کې تر ۱۱ لکه زیاتو کسانو پوښتنه کړې چې څرنګه بې له دې چې د چا سترګې ترخې او اوښلنې شي، پیاز رېزه کړي.
دا پوښتنه په یوټیوب کې تر ۶ ملیون تنو زیاتو کسانو کړې ده.
د پیاز د رېزه کولو په مهال د دې لپاره د انسان سترګې ترخېږي او اوښکې کوي چې پیاز داسې ترکیبونه لري چې له ماتېدو وروسته د انسان د سترګو طبیعي اوبه یې په وړاندې غبرګون ښيي او سلفراسید رامنځته کوي. د دې ستونزې د لېرې کولو لپاره د انسان سترګې ترخېږي.