تاند- د امریکا پوځ له عراق څخه افغانستان ته د خپلو سرتېرو او جنګي وسایلو لېږد پیل کړی دی.
د امریکايي رسنیو د راپور له مخې، عراقي چارواکو او دفاعي قراردادیانو په دې اړه له څه ویلو ډډه وکړه چې له عراق څخه څومره امریکايي پوځیان د افغانستان لور ته لېږل کېږي.
په دې اړه لومړی ځل اسوشیتید پریس خبري اژانس راپور وکړ.
دې اژانس د پینتاګون د ویندوی سمندري جګړن ادریان رینکین ګالووې په قول وویل چې حاضردمه په عراق کې د امریکايي پوځیانو شمېر ۵۲۰۰ دی خو په افغانستان کې ۱۴ زرو ته رسېږي.
ده وویل چې په افغانستان کې د امریکايي پوځیانو د شمېر زیاتېدا به مرسته وکړي چې لا ډېر افغان ځواکونه وروزل شي.
امریکایان وايي، وروسته له دې چې په عراق کې داعش وځپل شو، په دغه هیواد کې د امریکايي پوځیانو اړتیا نه لیدل کېږي.