محور ورځپاڼه: د کابل خاکجبار ولسوالي سقوط کوي

د کابل خاکجبار ولسوالۍ اوسېدونکي وايي، د وسله والو مخالفينو په ولکه کې ژوند کوي او تقريباً د نيم وطن ترهګريز بريدونه یې له سيمې تنظيم او رهبري کېږي.

د غوړی، شينواري، کټاره او ګرده مرغه په سيمه کې هغه طالب جنګيالي پټ دي، چې له ازرې، حصارت او سروبي څخه راتښتېدلي دي. دوی بمونه جوړوي، وسلې او مهمات يې خوندي کړي او په کابل ښار د بريد توان هم لري.

یوه سرچینه وايي، په خاکجبار کې دوه پخواني چارواکي انجینر افضل او قوماندان دیدار، چې يو مهال د کنړ والي و، په داخلي لانجو او نا امنۍ کې ښکېل دي او له وسله والو سره د همکارۍ شک پرې شوی دی.

خاکجبار له کابل څلويښت کیلومتره واټن لري، دغلته د وسله والو موجودیت د کابل لپاره د تهديد د کړکۍ په شان لاس په لستوڼي خطر دی. ځايي خلک ادعا کوي، چې ټوله سيمه یې د طالبانو په ولکه کې ده او له خلکو عشرونه ټولوي او حتی خپل قوانين عملي کوي.

ځايي خلک وايي، طالبان او وسله والې ډلې په شخصي لانجو کې ښکېل دي، خو د طالبانو ملاتړ د ځايي مشهورو مخورو له خوا چې پخوا دولتي چارواکي وو، کېږي. یوې سرچینې وویل، د مشرانو جرګې پخوانی غړى انجینر افضل او قوماندان دیدار چې يو مهال په کونړ کې والي و، په داخلي کشمکشونو او لانجو کې لاس وهي او د نا امنيو لامل دي.

په وروستۍ میاشت کې افغان امنيتي ځواکونو د لوګر په ازره او ننګرهار په حصارک ولسوالیو کې د طالب وسله والو پرضد سخت چاڼيز عمليات ترسره کړل، خو اوس د خاکجبار اوسېدونکي وايي، له یادو ولسواليو را تښتېدلي طالبان د خاکجبار په هغو سمڅو کې دېره دي، چې يو مهال مجاهدينو ورڅخه استفاده کوله.

ځايي خلکو د محور خبريال ته ويلي، طالبان له خاکجبار څخه د ټول کابل ښار امن تهديدولای شي او ټينګار کوي، چې په ښار نیم بريدونه له یادې سيمې تنظيم شوي دي. دوی وايي، مرموز لاسونه د خاکجبار د وسله والو ملاتړ کوي او له دولتي ګواښ څخه هم نجات ورکوي. تر دې وړاندې دولت درې پلا په خاکجبار کې د وسله والو پرضد چاڼيز عمليات کړي دي، خو لاهم ددې طالب اورپکو په مهارکولو نه دي توانېدلي.

د خاکجبار قومي مشر حاجي فريد وايي، د نا امنۍ ترڅنګ د ځمکو غصب او د غصب مافيا د خاکجبار سيمه په بې کچې نا امنه کړې ده. فريد ادعا کوي، چې د ځمکو په غصب کې د ولسي جرګې غړي هم ښکېل دي.

 ښاغلى فريد زياتوي، په وروستيو کې د کابل- جلال اباد سړک جوړېږي، چې وسله وال يې مخه نيسي. لس ورځې وړاندې يې د دغه سړک چارې ودرولې او طالبانو يې کارکوونکو ته ګواښ وکړ، چې که کار ونه دروي، نو وسايل به يې له منځه يوسي او کارکوونکي به يې ووژني.

د خاکجبار يو بل قومي مشر زيارت ګل وايي، طالبان غواړي افغان حکومت ته وښيي، چې کابل یې هم تر عملياتي نقشه لاندې دى.

د خاکجبار ولسوال عبدالباري عارض هم مني، چې په یاده ولسوالۍ کې د انکشاف او رغونې چارې ندي تر سره شوې :((شايد دا ستاسې لپاره ډېره په زړه پورې وي، چې ووايم، د کابل ښار په څلوېښت کيلومترۍ کې پرته د خاکجبار ولسوالي د روزګان او هلمند تر لرې پرتو ولسواليو وروسته پاتې او نا امنه ده.))

دى وايي، په تېرو پنځو مياشتو کې خاکجبار ولسوالي تر ګردو نا امنه شوې :((کله ناکله خو په دې وويرېږو، چې ولسوالي سقوط ونه کړي، ځکه له مرکز هېره ده. په تېره يوه مياشت کې درې ځلې چاڼيزعمليات شوي، خو هېڅ مثبته لاسته راوړنه يې نده لرلې.))