تاند- د طالبانو او داعشیانو په تروریستي حملو کې نن/دوشنبه/ په کندهار او کابل کې لږترلږه ۴۰ افغانان وژل شوي دي.
په کندهار کې انتحاري موټربمي حملې ۱۱ ماشومان شهیدان کړي او ۱۶ نور ژوبل کړي دي.
د کابل په تروریستي برید کې، چې داعش تروریستي ډلې یې مسوولیت په غاړه واخیست، لږترلږه د ۷ ژورنالیستانو په ګډون ۲۹ تنه شهیدان شوي او ۴۹ نور ټپیان دي. (د کابل د حملې نور جزییات)
له کندهاره ترلاسه شوي راپورونه وايي چې په دامان ولسوالي کې د طالبانو په موټر بمي حمله کې، چې هدف یې د یوه ښوونځي او یوه جومات ترڅنګ د بهرنیو پوځیانو کاروان و، ۱۱ تنکي ماشومان شهیدان شوي دي.
په دې برید کې ۵ رومانیايي پوځیان هم ژوبل شوي دي.
رومانیا د کندهار د دامان ولسوالي په حمله کې د خپلو ۵ پوځیانو ټپي کېدا تایید کړې ده.
وژل شوي ماشومان زده کوونکي ول.
چاودنې ښوونځی هم سخت زیانمن کړی دی.