تاند- د سعودي عربستان یوه ډاکتر د دغه هیواد د یوه محافظه کار ملا هغه ادعا رد کړه چې ویلي یې و موټرچلول د ښځو رحم ته زیان لري.
د ښځینه ناروغیو متخصص ډاکتر محمد بکنه د محافظه کار ملا شیخ صالح څرګندونې غیرعلمي وبللې، ویې ویل: علمي(ساینسي) څېړنو ثابته کړې نه ده چې موټرچلول دې د ښځو پر تولید مثل اغېز ولري.
شیخ صالح ویلي، هغه ښځه چې موټر چلوي، پر رحم یې ناوړه اغېز کېږي چې په نتیجه کې یې د ښځو د امیندوارۍ امکان کمېږي.
شیخ صالح او د سعودي عربستان نور محافظه کاره ملایان د ښځو د موټرچلولو مخالف دي. خو د ښځو پر موټرچلولو د بندیز لپاره شرعي دلیل نه شي وړاندې کولی. ویل کېږي چې ښايي شیخ صالح د همدې لپاره طبي دلایلو ته پناه وړې وي.
په همدې حال کې په سعودي کې د ښځو د موټرچلونې لپاره یوې مخکښې کمپاین کوونکې ډلې له ښځو غوښتي چې د راتلونکې اکتوبرمیاشتې په شپږ ویشتمه د ښځو د موټرچلونې د بندیز پرخلاف په موټرونو کې سړکونو او واټونو ته راووځي او دا بندیز په خپل سر پای ته ورسوي.
د سعودي عربستان په قوانینو کې داسي کومه ماده نشته چې ښځې موټر نه شي چلولی خو د ترافیکو ادارې ښځو او نجونو ته لایسنس نه ورکوي.
ډېرو سعودي ښځو موټر زده دی خو واټونو ته په موټرو کې راوتلی نه شي.