د ننګرهار د پوهنې پر ریاست په برید کې لږترلږه ۱۰ تنه ټپیان شوي

تاند- د ننګرهار د پوهنې پر ریاست د وسله والو ترهګرو د نن /دوشنبه/ سهار په برید کې لږترلږه ۱۰ تنه ژوبل شوي دي.

امنیتي چارواکي وايي چې ۴ ترهګر یې وژلي دي.

د ننګرهار د والي ویندوی عطا الله خوږیاڼي رسنیو ته وویل، حمله د سهار په ۹ بجې د پوهنې د ریاست په دروازه کې په انتحاري حملې پیل شوه.

ده همداراز وویل، امنیتي ځواکونو په ۱۰ دقیقو کې ۳ تروریستان له منځه یووړل.

خوږیاڼی وايي چې تراوسه پورې په دې برید کې امنیتي ځواکونو ته د مرګ ژوبلې هیڅ راپور نه لري.

په همدې حال کې امنیتي ځواکونو د پوهنې د ریاست د ودانۍ مخته یو موټر، چې چاودېدونکي مواد پکې بار ول، نیولی او چاودېدونکي مواد یې شنډ کړي دی.

د ننګرهار د عامې روغتیا ریاست تاییدوي چې ۱۰ تنه ټپیان روغتونونو ته وړل شوي دي.

د ننګرهار د پوهنې پر ریاست ډله ییز برید روان دی

تاند- د دولت وسله والو مخالفانو نن /دوشنبه/ د ننګرهار د پوهنې پر ریاست ډله ییزه برید کړی چې لا هم روان دی.

لومړني راپورونه وايي چې دوو انتحاریانو د پوهنې د ریاست د ودانۍ په دروازه کې ځانونه والوزول او څو تنه نور ودانۍ ته ننوتل.

د ننګرهار د پوهنې رييس اصف شینواري تایید کړه چې یو شمېر وسله وال حمله کوونکي د پوهنې د ریاست ودانۍ ته ننوتي دي.

تراوسه د حمله کوونکو ترهګرو شمېر څرګند نه دی.

امنیتي ځواکونه د پوهنې ریاست ته استول شوي او له ترهګرو سره په نښته بوخت دي.

تراوسه طالبانو یا داعش د دې برید مسوولیت په غاړه نه دی اخیستی خو داسې ښکاري چې دا برید د داعش ترهګرې ډلې کړی وي.

دې ډلې تېره اوونۍ د نجونو ښوونځیو ته خبرداری ورکړی وو چې له کبله یې د نجونو ۸۰ ښوونځي بند شول.

له دې چلا د ننګرهار په چپرهار ولسوالي کې د یوې چاودذنې په نتیجه کې ۱۲ ملکیان ژوبل شوي دي. چاودنه په یوه میله کې وشوه.