تاند- د ملا رسول په مشرۍ د طالبانو انشعابي ډلې د هیبة الله اخوندزاده د ډلې د ویندوی پر څرګندونو توند غبرګون څرګند کړ.
د ملا رسول تر مشرۍ لاندې د طالبانو د اسلامي امارت عالي شورا د چهارشنبې په ورځ ناوخته په یوه خبرپاڼه کې د ذبیح الله مجاهد پر دې خبره غبرګون ښکاره کړی چې ویلي یې و، د هیبة الله په مشرۍ د طالبانو له تحریکه پرته په افغانستان کې نور جماعتونه (ګوندونه) نشته.
د ملا رسول په مشرۍ د افغانستان د اسلامي امارت عالي شورا په خپله خبرپاڼه کې وايي چې د ذبیح الله مجاهد دا بیان په سختو الفاظو غندي او باور لري چې د مولوي هیبة الله ډله د «عامو مجاهدینو» رهبري او مسوولیت په غاړه نه لري.
د طالبانو په منځ کې درز وروسته له دې راغی چې د ملا محمد عمر د مړینې خبر تایید شو.
د ملا محمد رسول اخوند ډلې د هماغه وخت د طالبانو پر مشر ملا منصور اعتراض درلود چې د ملا عمر مړینه یې ولې ۲ کاله پټه ساتلې وه.
ملا منصور وروسته په پاکستان کې ووژل شو خو د طالبانو د دواړو ډلو ترمنځ اختلاف حل نه شو.
دې ته په پام چې د طالبانو کوربه هیواد او د سیمې نورو هیوادونو د هیبة الله ملاتړ ته دوام ورکړ د ملا رسول ډله ونه توانېده چې خپل نفوذ د لومړیو ورځو په شان وساتي.
د دې ډلې غړي ادعا کوي چې په پیل کې د کوټې شورا اکثرو غړیو د دوی ملاتړ کاوه.
THIS IS BEST CHANCE FOR MULA MUHAMMED RASUL MUJAHEED
GROUP TO DO PEACE WITH AFGHANS,
AND START HUMAN LIFE IN THE OWN HOU VILLAGE AND COUNTRY.
THANK YOU