تاند- په افغانستان کې د ناټو ملکي استازی وايي چې په دې هیواد کې تر بل هر وخت د سولې امکان زیات شوی او طالبان دې د افغانستان له حکومت سره مخامخ خبرې وکړي.
د ناتو ملکي استازي کورنیلیوس زیمرمن له عربیک نشنل سره په مرکه کې وویل، د کوچني اختر د ورځو اوربند بې ساری و او ویې ښودله چې طالبان د افغانستان له حکومت سره روغه کولی شي.
ده زیاته کړه، سوله ډېره اسانه هم نه ده خو د دواړو خواوو غوښتنې باید په احتیاط په پام کې ونیول شي او په عین حال کې باید د دواړو خواوو ترمنځ د اعتماد فضا رامنځته شي.
زیمرمن له طالبانو وغوښتل چې خپلو غوښتنو ته د رسېدو لپاره د جګړې پر ځای د سولې لاره خپله کړي.
د ناټو ملکي استازی وايي چې د افغانستان ځینې ګاونډیان په افغانستان کې د سولې او د وسله والو مخالفانو د ملاتړ په برخه کې دوه ګون چلند کوي.
د ده په وینا اوس هم د افغانستان د حکومت او طالبانو ترمنځ غیررسمي خبرې روانې دي.
طالبان دا خبره نه تاییدوي چې د افغانستان له حکومت سره پټې خبرې کوي خو ګڼې دولتي او غیردولتي سرچینې تاییدوي چې طالبان له بېلابېلو حکومتي چارواکو سره په تماس کې دي.