تاند- په بغلان ولایت کې امنیتي چارواکي وايي، وسله والو طالبانو د دې ولایت په بورکه ولسوالي کې د انتخاباتو د کمیسیون ۲۰ تنه ساحوي کارکوونکي یرغمل کړي دي.
د بغلان د بورکې ولسوالي قوماندان محمدعلي ابراهیمي نن /جمعه/ وویل، د انتخاباتو د خپلواک کمیسیون د ساحوي دفتر دا ۲۰ کارکوونکي دوې ورځې وړاندې د تنګي مرچ په سیمه کې تښتول شوي دي.
د ابراهیمي په وینا، طالبانو د انتخاباتو د کمیسیون یو شمېر نورو کارکوونکو ته د ټېلفون له لارې خبرداری ورکړی چې د انتخاباتو په ورځ /سبا/ کار ته حاضر نه شي.
له بلې خوا په بغلان کې د انتخاباتو د خپلواک کمیسیون ولایتي رييس عبدالقادر صافي ویلي چې طالبانو په بورکه ولسوالي کې د رای ورکولو د ساحوي مرکزونو ۴۵ کارکوونکي برمته کړي وو چې د هغو له منځه یې ۳۵ تنه خوشي کړي خو ۱۰ تنه لا هم له دې ډلې سره یرغمل دي.
صافي دا هم وویل چې نن سهار /جمعه/ طالبانو په بورکه ولسوالي کې د رای ورکولو د یوه مرکز د مسوول پلار او ورور له ځان سره بیولي دي.
د بغلان د بورکې ولسوالي په مرکز او کلیو کې به سبا د رای ورکولو ۸ مرکزونه پرانیستي وي.
په بغلان ولایت کې دا ولسوالي، چې له کندوز او تخار سره پوله لري، تر ټولو ناامنه ولسوالي ګڼل کېږي.