تاند- جاپاني چارواکي وايي، د دغه هیواد په شمالي سواحلو کې یو ټاپو ورک شوی او سمندرغاړي ساتونکي د دې جزیرې د موندلو په لټه کې دي.
ګومان کېږي چې دا ټاپو به تر اوبو لاندې شوی وي.
د جاپان ساحل ساتونکو د بې درکه شوي ټاپو د موندلو لپاره پراخې هلې ځلې پیل کړي دي. که دا ټاپو، چې (ایسانبي هاناکویتا کوجیما) نومېږي، ونه موندل شي د جاپان نقشه او نړیوالې پولې به یې بدلې شي.
د راپورونو له مخې، ښايي (ایسانبي هاناکویتا کوجیما) ټاپو د تېزو بادونو، واورو او بارانونو له کبله د اخڅیک سمندرګي تر اوبو لاندې شوی وي.
اخڅیک سمندرګی د جابان د شمال په هوکایدو سیمه کې د دغه هیواد او روسیې ترمنځ دی.
د جاپان په ایسانبي هاناکویتا کوجیما ټاپو کې څوک نه اوسېدل. جاپان دا ډول بې هستوګنو ۱۵۸ نور ټاپوګان هم لري.