تاند- د امریکا د بهرنیو چارو وزیر جان کیري د افغانستان له ولسمشر حامد کرزي سره د فوري خبرو لپاره نن کابل ته ورسېد.
کیري په داسي حال کې افغانستان ته سفر کړی چې امریکا په افغانستان کې د امریکايي پوځیانو د پاتې کېدو لپاره د امنیتي موافقې د نهايي کولو لپاره د اکتوبر میاشت وروستی ضرب الاجل ټاکلی دی.
د امنیتي موافقې پر سر د افغانستان او امریکا خبرې پر یو لړ مسایلو، چې د افغانستان حکومت یې د خپل هیواد د ملي حاکمیت ته ضروري بولي، د نه موافقې له کبله له خنډ سره مخامخ شوي دي.
د امریکا متحد ایالتونه د روان اکتوبر تر پایه د دې موافقې د نهايي کېدو غوښتونکی دی.
امریکايي چارواکي وايي چې دوی موافقې ته خوشبینه دي خو د دواړو خواوو ترمنځ په خبرو کې له موجود خنډه داسي ښکاري چې ممکن دواړه هیوادونه د میاشتې تر پایه موافقه لاسلیک نه کړای شي.
د افغانستان حکومت وايي چې امریکا باید له ۲۰۱۴ وروسته د افغانستان په کلیو کې عملیات ودروي او پر افغانستان د بهرني یرغل په وړاندې د افغانستان دفاع وکړي.
که موافقه لاسلیک نه شي نو له ۲۰۱۴ وروسته به هیڅ امریکايي پوځي په افغانستان کې پاتې نه شي.
له جان کیري سره د افغانستان په سفر کې ملګرو امریکايي مقاماتو په الوتکه کې خبریالانو ته وویل، امریکا باور لري چې د اکتوبر په یودېرشمه موافقه ممکنه ده او که دا کار ونه شي نو جدي ستونزې به پېښې شي.
دوی وايي چې که د میاشتې تر پایه پوري موافقه نهايي نه شي له افغانستانه به د ځواکونو د وتلو په راتلونکي مرحله کې لا زیاتې ستونزې جوړې شي.
که امریکا موافقه ونه کړي ښايي د ناټو بل هیڅ غړی په افغانستان کې پوځیان پرېنږدي.
جرمني مخکې لا ویلي چې د اته سوه سرتېرو د پرېښودولو په اړه به خپله ژمنه عملي نه کړي.
حاضردمه په افغانستان کې د ناټو ۸۷ زره پوځیان دېره دي چې ۵۲ زره یې امریکایان دي.
امریکا غواړي چې له ۲۰۱۴ وروسته په افغانستان کې شاوخوا لس زره پوځیان په افغانستان کې پرېږدي.