تاند- سامسونګ خپل قاتېدونکی موبایل، چې څه باندې ۷ اینچه شیشه یا سکرین لري، نندارې ته وړاندې کړ.
دا ملفون یا موبایل د سامسونګ تر نورو موبایلونو په سلو کې ۴۵ نازک دی.
د اسوشیتید پریس خبري اژانس د راپور له مخې، سامسونګ ویلي چې خپل دا قاتېدونکی موبایل به، چې ۷ اعشاریه ۳ اینچه دی، په راتلونکو میاشتو کې بازار ته راوباسي.
د سامسونګ دا موبایل (Infinity Flex Display) سکرین یا شیشه لري چې موبایل پرې پرانیستل کېږي او پر ټبلېټ بدلېږي.
د دې موبایل اندروید سافټوېر د دې لپاره اپ ګرېډ شوی چې له قاتېدو سره یې مرسته وکړي.
د دې کمپنۍ په وینا دا موبایل یې د دې لپاره نازک جوړ کړی چې شیشه یې قات شي او په زرګونو ځله په قات را قاتېدو تاوان ونه ویني.
په دې موبایل کې په یو وخت له ۳ اپلیکېشنونو څخه کار اخیستل کېدای شي.