تاند- په افغانستان کې د امریکا پوځ نن /شنبه/ وویل چې د داعش یا اسلامي دولت د وسله والې سختدریځې ډلې یو مهم قوماندان په یوه برید کې وژل شوی دی.
په افغانستان کې د امریکايي ځواکونو ویندوی اوبن میندي وايي، د داعش قوماندان خطاب امیر د پنجشنبې د ورځې /جنوري ۱۰/ په برید کې وژل شوی دی.
د رویټرز خبري اژانس د راپور له مخې، په افغانستان کې د امریکا پوځ ویلي، امیر- چې څو نومونه یې لرل- غټې حملې ترتیبولې او د داعش جګړه مارو ته یې وسلې او چاودېدونکي مواد چمتو کول.
د امریکايي ځواکونو ویندوی میندي ویلي «د ده (امیر) وژل کېدا مرسته کوي چې په راتلونکې کې بېګناه افغانان د اسلامي دولت له تشدده وژغورل شي او له بلې خوا په ننګرهار کې د دې ډلې حضور کمزوره شي.»
په خبر کې د حملې د دقیق ځای یادونه نه ده شوې. په دې باب هم څه نه دي ویل شوي چې د داعش پر قوماندان برید هوايي او که مځکني و.
په همدې حال کې راپورونه وايي چې د داعش لسګونه کسان د ننګرهار په ګاونډي ولایت کونړ کې له وسله والو طالبانو سره په نښتو کې، چې شاوخوا یوه اوونۍ یې دوام کړی، وژل شوي دي.