تاند- د افغانستان د ملي امنیت ریاست وايي چې په یو لړ عملیاتو کې یې د طالبانو ۴ مهم ترهګر نیولي دي.
د ملي امنیت ریاست د پنجشنبې په ورځ وویل، د طالبانو دا ۴ غړي د دې ډلې تر ټولو د ویجاړوونکې شبکې کسان ول چې د ملي امنیت ریاست د ځانګړو ځواکونو له لوري د پلازمېنې په پنځمه امنیتي حوزه کې نیول شوي دي.
د ملي امنیت ریاست د نیول شویو کسانو نونونه په دې ډول ښودلي دي:
عبدالله د ګل رسول زوی، نوموړی د شبکې مشر بلل شوی دی.
همایون د مجنون زوی.
میوند د شربت زوی
فریدالله الیاس احمدزی د ریدي ګل زوی.
د ملي امنیت ریاست ادعا کړې چې نیول شویو کسانو اعتراف کړی چې دوی د کابل په پغمان ولسوالي کې د طالبانو د یوه مشر اسدالله نصرت له لوري د دې ډلې لیکو ته جذب شوي او دنده ورسپارل شوې وه چې بمي چاودنې، وسله والې غلاوې او هدفي قتلونه وکړي.
د ملي امنیت ریاست په وینا نیول شویو کسانو اقرار کړی چې لږترلږه په پغمان ولسوالي او کابل ښار کې یې په ۷۰ بمي چاودنو کې لاس لرلی، ۳ هدفي وژنې او وسله والې غلاوې یې کړي دي.
وسله والو طالبانو تراوسه پورې په دې اړه څه نه دي ویلي.