تاند- د پاکستان د بهرنیو چارو وزیر شاه محمود قریشي وايي، د افغانستان د سولې هدف یوازې د پاکستان مسوولیت نه دی بلکې د ټولو نفوذلرونکو ګډ مسوولیت دی.
ښاغلي قریشي پرون /شنبه/ د پاکستان له یوه خصوصي تلویزیون سره په مرکه کې وویل، د امریکا د متحدو ایالتونو، د افغانستان د حکومت او د سیمې د نورو هیوادونو په شمول ټول نفوذلرونکي باید په افغانستان کې د سولې د ټینګښت لپاره خپل رول ولوبوي.
قریشي دا څرګندونې وروسته له دې وکړې چې د دغه هیواد د پوځ ویندوی اصف غفور او دغه راز په کابل کې د پاکستان سفیر زاهد نصرالله وویل چې که هند پر پاکستان حمله وکړي د افغانستان د سولې پروسه به زیانمنه شي.
څرګنده نه ده چې د ښاغلي قریشي اشاره څه ته ده خو د هند له حملې سره د افغانستان د سولې له مشروطولو سره د دغه هیواد د چارواکو څرګندونو ته په کتو داسې ښکاري چې قریشي له امریکا ضمانت غواړي چې هند به د کشمیر د پلوامې د حملې غچ نه اخلي.
د پلوامې په ځانمرګي برید کې ۴۱ هندي سرتېري ووژل شول چې په هند کې یې پراخ غبرګونونه راوپارول.