تاند- سپینې ماڼۍ د پنجشنبې په ورځ اعلان وکړ چې ولسمشر ډانلډ ټرمپ د افغانستان د سولې هلوځلو ته لومړیتوب ورکړی او د ده ځانګړي استازي له طالبانو سره مخامخ خبرې پیل کړي خو د امریکا ولسمشر به د متحدو ایالتونو د تاریخ تر ټولو د اوږدې جګړې د پای ته رسولو پر سر بده معامله ونه مني.
د امریکايي رسنیو د راپور له مخې، د ټرمپ د حکومت یوه جګپوړي چارواکي وویل، امریکا متبادل پلانونه هم لري چې که د سولې خبرواترو هغسې نتیجه ورنه کړه چې توقع ده، ممکن پوځي انتخابونو ته مخه کړي.
د سپینې ماڼۍ یوه چارواکي خبریالانو ته وویل«موږ یقیتاً په افغانستان کې د سولې هلوځلو ته لومړیتوب ورکوو. خو په هغو ټولو خبرو کې چې د امریکا امنیتي ګټې نغښتې وي، موږ متبادل پلانونه هم په پام کې نیسو. ولسمشر ویلي چې د سولې په خبرو کې د ښې نتیجې هیله لري، خو هغه به بده معامله ونه مني.»
ده زیاته کړه«ولسمشر دا مني چې موږ په افغانستان کې د تروریزم پر ضد په جګړه کې حیاتي ګټې لرو نو موږ به هر هغه کار وکړو چې د امریکا امنیتي ګټې خوندي شي.»
دغه امریکايي چارواکي، چې نه یې غوښتل نوم یې واخیستل شي، همداراز ویلي، امریکا به د بشري حقونو- په ځانګړي ډول د ښځو حقونو په شمول د تېرو ۱۸ کلونو بریاوې قرباني نه کړي. موږ به په هیڅ صورت له دې بریاوو تېر نه شو.»
ده دا هم وویل چې خلیلزاد ډېره هڅه کوي چې د افغانانو ترمنځ د خبرو لار هواره کړي او طالبان د افغانستان د حکومت له چارواکو سره خبرو ته کښېنوي.
د محب څرګندونې به د امریکا او افغانستان اړیکې اغېزمنې نه کړي
تېره اوونۍ د افغانستان د ملي امنیت سلاکار حمدالله محب پر زلمي خلیلزاد توندې نیوکې وکړې او سپینې ماڼۍ هم له هغه سره کتنه لغوه کړه.
پر خلیلزاد د حمدالله محب د نیوکو په اړه د سپینې ماڼۍ چارواکي د یوې پوښتنې په ځواب کې وویل چې د امریکا حکومت د افغانستان د ملي امنیت د سلاکار پر دې شخصي حملو کلک اعتراض وکړ.
دغه امریکايي چارواکي په عین حال کې وویل چې دا مسله به د افغانستان او امریکا ترمنځ دوه اړخیزې اړیکې اغېزمنې نه کړي.
ده زیاته کړه«موږ دې اړیکو ته ډېر ارزښت ورکوو. موږ له افغان امنیتي ځواکونو سره اوږه په اوږه د جګړې په میدان کې جنګېږو، موږ افغانستان ته د ثبات راوستلو لپاره په ګډه کار کوو او هلته په ګډه د تروریزم د ګواښونو پر ضد جنګېږو.»
د سپینې ماڼۍ دې چارواکي د محب څرګندونو ته په اشارې وویل«دا د هغې نهیلۍ غبرګون دی چې دوی د امریکا او طالبانو ترمنځ په خبرو کې شامل نه دي. نو دا ضروري ده چې موږ طالبانو ته قناعت ورکړو چې د افغانستان له حکومت او نورو افغانانو سره خبرو ته کښېني او سیاسي پروسه پیل کړي.»
د سپینې ماڼۍ دې چارواکي ټینګار وکړ چې هیڅ حللار او موافقه به تر هغو ګټه ونه کړي چې طالبانو د افغانستان له نفوذ لرونکو خواوو سره نه وي کړې.
«طالبان باید د افغانستان له حکومت او نورو افغانانو سره خبرې وکړي او مسلې حل کړي. زما په فکر باید دا مسله په فوري ډول په پام کې ونیول شي.»
د سپینې ماڼۍ چارواکي وویل چې د امریکا متحد ایالتونه به له طالبانو سره د سولې د خبرو په اړه د افغانستان له حکومت سره له نژدې سلا مشورې وکړي.
«موږ په هغو لاروچارو غور کوو چې د دوو حکومتونو ترمنځ تماسونه ښه کېدای شي. امریکا د دواړو خواوو ترمنځ د همږغۍ او همکارۍ پر ډېرېدو کار کوي.»
د سپینې ماڼۍ چارواکي دا څرګندونې وروسته له دې وکړې چې ګومان کېده د امریکا او افغانستان د حکومتونو ترمنځ اړیکې مخ په خرابېدو دي او ښايي د امریکا حکومت د محب پر ضد له خپل سخت دریځه تېره نه شي.
د افغانستان لپاره د امریکا ځانګړی استازی زلمی خلیلزاد به د افغانستان د سولې د هلوځلو د ملاتړ د خپلولو لپاره د پنجشنبې او جمعې په ورځو د روسیې، چین او اروپايي اتحادیې له استازو سره وویني.
خلیلزاد د افغانستان د مسلې د سوله ییز حل لپاره تراوسه پورې له طالبانو سره څو ځلې مخامخ خبرې کړي دي.
HONOR TRUMP THIS WILL BE BIG MISTAKE IF USA TRUST TALIBS.
BECAUSE TALIBS HAVE CONNECTION WITH AL QAEEDA.
HAQANI BRANCH HAVE CONNECTION WITH ALQAEEDA.
PAKISTAN CARRY 71 TERRORIST GANGS,TALIBS HAVE RELATION WITH ALL OF THEM.
TALIBS IS NOT ONE ORGANIZE LEADER SHIP.
THEY ARE GORILA GROUPS&EVERY ONE OWN LEADER.THEY ARE
SEPARATLY GET TRAINING BY ISI.
AFGHAN GOVERNMENTIS REPRESENTIVE FROM ALL AFGHANS.
ALL AFGHANS SPECIAL AFGHAN WOMENS ARE WORRY FOR THE
DECISION WITH TALIBS. THANK YOU
no i dont think so its like that