تاند- د امریکا د بهرنیو چارو وزارت نن /سې شنبه/ وویل چې د افغانستان د سولې لپاره د متحدو ایالتونو ځانګړي استازي د افغانستان په ګډون ۷ هیوادونو ته سفر پیل کړی دی.
د امریکا د بهرنیو چارو وزارت وايي چې زلمی خلیلزاد په افغانستان کې د سولې د هلوځلو په لړ کې د افغانانو ترمنځ د هراړخیزو خبرو لپاره د ټولو افغان خواوو د رایوځای کولو په هدف د مارچ له ۲۵ څخه د اپریل تر ۱۰ پورې افغانستان، بریتانیا، بلجیم، پاکستان، ازبکستان، اردن او قطر ته ځي.
د امریکا د بهرنیو چارو وزارت له خبرپاڼې سره سم، زلمی خلیلزاد به په کابل کې د افغانستان د حکومت له مشرانو او نورو افغانانو سره د امریکا او طالبانو د خبرو په اړه وږغېږي او هغوی به د یوه پراخ مرکچي پلاوي جوړولو ته وهڅوي.
دا وزارت وايي چې د افغانستان د سولې لپاره د امریکا ځانګړی استازی به له افغان مشرانو سره د طالبانو او امریکايي پلاوي د خبرو د راتلونکي پړاو په اړه سلا مشورې وکړي.
دا په داسې حال کې ده چې ښاغلي خلیلزاد د پنځم پړاو خبرو په اړه د افغانستان حکومت ته معلومات ورنه کړل چې د افغانستان د حکومت له توند غبرګون سره مخامخ شو.
د امریکا د باندنیو چارو وزارت وايي چې ځانګړی استازی به یې له متحدو او شریکو هیوادونو سره د سولې د خبرو د حالت او په افغانستان کې له سولې او پرمختګ سره د نړیوالې ټولنې پر دوامدارو ژمنو او همږغۍ خبرې وکړي.
د امریکا د بهرنیو چارو وزارت نه دي ویلي چې خلیلزاد لومړی کوم هیواد ته ځي او په قطر کې له طالبانو سره بل پړاو خبرې کله پیلوي.