خبریال: رفيع الله مندوخېل، اسلام اباد
د غويي، ثور ۲ مه ۱۳۹۸۷
په بلوچستان کې د زرګونه افغان ماشومانو په شمول شاوخوا دوه نيم ميلیون ماشومان د ګوزڼ ضد د واکسناسيون د کمپاين په ترڅ کې واکسين کېږي. افغان کډوال ماشومان د بلوچستان په سرخاب، ګردي ځنګل، کټوۍ او سرانان کډوالو کمپونو کې مېشت دي.
نن د دوشنبې په ورځ په کوټه کې د پوليو يا ګوزڼ ناروغۍ ضد د بېړنيوعملياتو چارواکيو ویلي، د ايالت په دري دېرش ولسواليو کې د ګوزڼ يا پوليو ناروغۍ ضد د واکسيناسيون درې ورځنی کمپاين پيل شوی، چې له مخې به يې په ټول ايالت کې شاوخوا دوه ميليون ماشومان چې عمرونه يې تر پنځو کلونو پورې وي واکسين شي. د کمپاين په ترڅ کې به په ايالت کې په مهاجر کمپونو کې مېشت د زرګونه افغان کډوالو ماشومانو په شمول شاوخوا څلرويشت لکه ماشومان د ناروغۍ پرضد واکسين شي.
د ايالت د ګوزڼ ناروغۍ ضد د بېړنيوعملياتو چارواکي زياتوي، چې د کمپاین لپاره څه د پاسه اته زره ګرځنده روغتيايي ټيمونه په دنده ګومارل شوي، چې ماشومانو ته به د واکسين ترڅنګ وټامن اې هم ورکړي.
د بلوچستان هغه سيمې چې په کې د امنيت وضع ښه نه ده، د واکسيناتورانو د ساتنې په موخه پوليس، لېويز او د سرحدي ملېشې سرتېري په دنده ګومارل شوي، څو روغتيايي کارکوونکي په ډاډه زړه خپل کار ترسره کړي.
د ماشومانو نړيوال صندوق يونيسيف وايي، چې د روان مېلادي په لومړيو څلورو مياشتو کې په پاکستان کې څلور ماشومان په ګوزڼ ناروغۍ اخته شوي دي. خو په مېلادي کال ۲۰۱۴ کې په شاوخوا درې سوه ماشومانو کې د ګوزڼ ناروغۍ ويروس کشف شوی و.
روغتيايي کارپوهان وايي، چې د ماشومانو فلج کوونکې ګوزڼ ناروغۍ د تېرې مېلادي پېړۍ په ۱۹۸۸م کال کې د نړۍ په يوسل پنځه ویشت هېوادونو کې شتون درلود، خو اوس یواځې پاکستان او ګاونډي هيواد افغانستان د هغو هېوادونو په لیست کې پاتې دي، چې لا هم دا ناروغي پکې له منځه نه ده تللې.
په همدې حال کې د افغانستان د روغتیا د چارو مسوولانو وویل چې په هلمند او اروزګان ولایتونو کې د پولیو ۳ مثبتې قضیې ثبت شوي دي.