تاند- افغانستان او ایران له اوږدو خبرواترو وروسته بالاخره د هلمند د اوبو د استفادې په اړه موافقه لاسلیک کړه.
د اذربایجان تریند خبري اژانس د ایراني چارواکو په قول نن /شنبه/ راپور ورکړ چې په کابل کې د دواړو هیوادونو د اوبو د کمیسیونونو د غونډې په پای کې افغانستان او ایران موافقه وکړه چې د دوو هیوادونو ترمنځ د ۱۹۷۳ م کال د موافقې د ښې اجرا لپاره به په هلمند سین کې میتر یا د اوبو د اندازه کولو وسایل کښېږدي.
د ایران د انرژۍ وزارت په خپله ویبپاڼه کې د خپل هیواد د انرژۍ د مرستیال وزیر قاسم تقي زاده خامیسي په قول لیکلي«په یوه خورا ورورګلویز چاپېریال کې، موږ ښو نتیجو ته ورسېدو، او دواړو خواوو ټینګار وکړ چې د هلمند سین د اوبو د کارولو لپاره عملیاتي پلان باید ترتیب شي چې د دواړو هیوادونو خلک، په تېره بیا د افغانستان د نیمروز او د ایران د سیستان او بلوچستان ولایت اوسېدونکي د هغه له پایلو څخه ښه استفاده وکړي.»
ده همداراز ویلي چې د دې موافقې هدف دا دی چې د هلمند سین اوبه په لا دقت تنظیم شي.
د ایران د انرژۍ وزارت وايي چې حاضر دی له افغانستان سره د انرژۍ او اوبو په تېره بیا په افغانستان کې د اوبو د څېړنیز مرکز په جوړولو کې همکاري وکړي.
تراوسه پورې د افغانستان او اوبو او انرژۍ وزارت له ایران سره د هلمند سین د اوبو پر سر د موافقې په اړه څه نه دي ویلي.
دواړو هیوادونو د محمد موسي شفیق د صدارت په دوره کې د هلمند د اوبو د وېش پر سر موافقه کړې وه خو ایران ادعا کوي چې تر هغې اندازې کمې اوبه ورپرېښودل کېږي چې په ۱۹۷۳ م کال کې شوې وه.
خو افغانستان وايي چې د وچکالیو له کبله د هلمند سین د اوبو اندازه کمه شوې او ایران باید توقع ونه لري چې لا به هم هومره اوبه ورته بهېږي څومره چې په اویایمه لسیزه کې بهېدې.